ជប៉ុនរំពឹងថា ស្ថានភាពព្រំដែន កម្ពុជា-ថៃ នឹងធូរស្រាលដោយសន្តិវិធី
ភ្នំពេញ ៖ លោក KITAMURA Toshihiro អ្នកនាំពាក្យក្រសួងការបរទេសជប៉ុន បានបង្ហាញក្តីរំពឹងទុកថា ស្ថានភាពជម្លោះព្រំដែន កម្ពុជា-ថៃ ដែលកំពុងស្ថិតក្នុង ភាពផុយស្រួយនៅឡើយនោះ នឹងមានស្ថានភាពធូរស្រាល ដោយប្រើប្រាស់យន្តការសន្តិវិធី ដើម្បីឈានទៅដល់ការបញ្ចប់ជម្លោះ។
អ្នកនាំពាក្យក្រសួងការបរទេសជប៉ុន បានលើកឡើងក្នុងសេចក្តីថ្លែងការណ៍ ស្តីពីកិច្ចប្រជុំគណៈកម្មាធិការព្រំដែនទូទៅ រវាងកម្ពុជា-ថៃថា ជប៉ុនស្វាគមន៍កម្ពុជា-ថៃ បានបើកកិច្ចប្រជុំគណៈកម្មាធិការព្រំដែនទូទៅ នៅថ្ងៃទី១០ ខែកញ្ញា ឆ្នាំ២០២៥ ជាមួយនឹងវឌ្ឍនភាព ក្នុងកិច្ចពិភាក្សាទាក់ទង នឹងការបង្កើតក្រុមអ្នកសង្កេតការណ៍អាស៊ាន ការដោះមីន និងការបន្តឡើងវិញ នូវភស្តុភារឆ្លងព្រំដែន ដែលតំណាងឲ្យលទ្ធផល ដ៏សំខាន់មួយ ដើម្បីជំរុញកិច្ចព្រមព្រៀងឈប់បាញ់ រវាងប្រទេសទាំងពីរ ។
លោកបន្តថា រដ្ឋាភិបាលជប៉ុនគោរព ចំពោះកិច្ចខិតខំប្រឹងប្រែងការទូត របស់គ្រប់ភាគីពាក់ព័ន្ធក្នុងការកោះប្រជុំគណៈកម្មាធិការនេះ រួមទាំងប្រទេសម៉ាឡេស៊ី ដែលបានលះបង់ខ្លួនដើម្បីឈានទៅមុខ លើកិច្ចព្រមព្រៀងឈប់បាញ់ ក្នុងនាមជាប្រធានអាស៊ាន ។
អ្នកនាំពាក្យបញ្ជាក់ថា រដ្ឋាភិបាលជប៉ុនរំពឹងថា ប្រទេសទាំងពីរនឹងបន្តអនុវត្ត តាមកិច្ចព្រមព្រៀងឈប់បាញ់ ហើយភាពតានតឹងរវាងកម្ពុជា និងថៃនឹងធូរស្រាល ដោយសន្តិវិធី តាមរយៈការសន្ទនា ដោយចាត់ទុកថា នេះគឺទំនាក់ទំនងសហប្រតិបត្តិការល្អ រវាងប្រទេសទាំងពីរដែលមានសារៈសំខាន់ខ្លាំងណាស់សម្រាប់សន្តិភាព និង ស្ថិរភាពក្នុងតំបន់ ។
ក្នុងន័យនេះ ជប៉ុននឹងបន្តខិតខំប្រឹងប្រែង ជំរុញការអនុវត្តប្រកបដោយស្ថិរភាពនៃកិច្ចព្រមព្រៀងឈប់បាញ់ និងការបន្ថយស្ថានការណ៍ ដោយមានការសម្របសម្រួលជាមួយបណ្តាប្រទេសពាក់ព័ន្ធ ។
សូមបញ្ជាក់ថា លទ្ធផលនៃកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC)រវាងកម្ពុជា-ថៃ នាថ្ងៃទី១០ ខែកញ្ញា ឆ្នាំ២០២៥ នៅខេត្តកោះកុង នៃព្រះរាជាណាចក្រកម្ពុជា ភាគីទាំងពីរបានរួមគ្នាប្តេជ្ញាចិត្តយ៉ាងមុតមាំ ដើម្បីដោះស្រាយបញ្ហាដោយសន្តិវិធី និងជៀសវាងការប៉ះទង្គិចគ្នា ដើម្បីធានាឲ្យតំបន់ព្រំដែនមានសន្តិភាពឡើងវិញ ៕
