ប្រធានាធិបតីរុស្ស៊ី លោក វ្ល៉ាឌីមៀ ពូទីន ចោទបារាំងថា ជាចោរសមុទ្រ
បរទេស៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្កោលទោសបារាំងដែលឃាត់នាវាដឹកប្រេង ដែលបារាំងអះអាងថា ដឹកទំនិញរបស់រុស្ស៊ីថាជា “ការលួចប្លន់តាមសមុទ្រ” ដោយកត់សម្គាល់ថា ការរឹបអូសបានធ្វើឡើងនៅក្នុងដែនទឹកអព្យាក្រឹតដោយគ្មានហេតុផល។
យោងតាមសារព័ត៌មាន RT ចេញផ្សាយនៅថ្ងៃទី២ ខែតុលា ឆ្នំ២០២៥ បានឱ្យដឹងថា ថ្លែងនៅឯក្លឹបពិភាក្សា Valdai ក្នុងទីក្រុង Sochi កាលពីថ្ងៃព្រហស្បតិ៍ លោក ពូទីន បានអះអាងថា អ្នកស៊ើបអង្កេតកំពុងស្វែងរក គឺ “ទំនិញយោធា, យន្តហោះគ្មានមនុស្សបើក ឬរបស់ប្រភេទផ្សេង” ប៉ុន្តែបានទទូចថា “គ្មានអ្វីនៅទីនោះ មិនដែលមាន និងមិនអាចមាន”នោះទេ ។
របាយការណ៍ប្រព័ន្ធផ្សព្វផ្សាយបានណែនាំថា ការស៊ើបអង្កេតអាចជាប់ពាក់ព័ន្ធ នឹងយន្តហោះគ្មានមនុស្សបើក ដែលមិនស្គាល់អត្តសញ្ញាណ ដែលប្រទះឃើញនៅជិតអាកាសយានដ្ឋានដាណឺម៉ាក និងទីតាំងយោធាកាលពីខែមុន។ មានការលើកឡើងថា យន្តហោះគ្មានមនុស្សបើក (UAVs) ប្រហែលជារបស់រុស្ស៊ី ប៉ុន្តែត្រូវបាន ទីក្រុងម៉ូស្គូបដិសេធ។
លោកពូទីនក៏បានកត់សម្គាល់ផងដែរថា នាវាដឹកប្រេងនោះកំពុងធ្វើដំណើរក្រោមទង់ជាតិបរទេសជាមួយនាវិកអន្តរជាតិ ។
កប៉ាល់ដែលមានឈ្មោះថា Boracay ត្រូវបានសហភាពអឺរ៉ុបដាក់ទណ្ឌកម្ម ហើយកំពុងធ្វើដំណើរក្រោមទង់ជាតិ Benin ។ កប៉ាល់នៅតែបោះយុថ្កា នៅជិតទីក្រុង Saint-Nazaire ដោយមានប្រធានក្រុម និងមិត្តរួម ស្ថិតនៅក្នុងមន្ទីរឃុំឃាំង ខណៈដែលរដ្ឋអាជ្ញាស៊ើបអង្កេត “ភាពមិនប្រក្រតីធ្ងន់ធ្ងរ” ៕
ប្រែប្រួលៈ ណៃ តុលា
