គណបក្សប្រជាជនកម្ពុជា ស្រុកបាកាន ចេញសេចក្តីថ្លែងការណ៍ថ្កោលទោស ភាគីថៃ ចំពោះសកម្មភាពអសិលធម៌ មកលើថ្នាក់ដឹកនាំកម្ពុជា !
ពោធិ៍សាត់ ÷ យើងខ្ញុំទាំងអស់គា្នជាថ្នាក់ដឹកនាំ សមាជិក សមាជិកា នៃគណបក្សប្រជាជនកម្ពុជាស្រុកបាកាន សូមសម្តែងនូវ ការសោកស្តាយជាពន់ពេក និងថ្កោលទោសយ៉ាងដាច់អហង្ការ ចំពោះសកម្មភាពអសីលធម៌ ខ្វះសេចក្ដីថ្លៃថ្នូររបស់ ជនជាតិថ មួយចំនួន ដែលបានយករូបថត សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជន កម្ពុជា និងជាប្រធានព្រឹទ្ធសភានៃព្រះរាជាណាចក្រកម្ពុជា និងឥស្សរជនជាន់ខ្ពស់កម្ពុជាដទៃទៀតទៅធ្វើ សកម្មភាពមិនគួរគប្បី និងអសីលធម៌នៅតាមទីសាធារណៈក្នុងប្រទេសថៃ។
អាកប្បកិរិយារបស់ជនជាតិថៃទាំងនេះ គឺជាការប្រមាថយ៉ាងធ្ងន់ធ្ងរបំផុត ដល់ឧត្តមភាពរបស់ឥស្សរជន កំពូលកម្ពុជា ដែលប្រជាជនគោរពស្រឡាញ់ និងចាត់ទុកសម្ដេចតេជោ ជារដ្ឋបុរសជាតិកម្ពុជា ដែលបានធ្វើពលិកម្មតស៊ូ លះបង់ និង បូជាសាច់ស្រស់ឈាមស្រស់ ដើម្បីជាតិ និងមាតុភូមិកម្ពុជា។ ទង្វើនេះមិនត្រឹមតែធ្វើឱ្យប៉ះពាល់ ដល់កិត្តិយស និងសេចក្តី ថ្លៃថ្នូររបស់ឥស្សរជនកំពូលរបស់ជាតិប៉ុណ្ណោះទេ ប៉ុន្តែនេះជាការប្រមាថយ៉ាងធ្ងន់ធ្ងរ ដល់សេចក្ដីថ្លៃថ្នូរ របស់មនុស្សជាតិ តម្លៃសីលធម៌ និងការគោរពគ្នាទៅវិញទៅមក រវាងប្រជាជាតិ និងប្រជាជាតិ ជាពិសេសទំនាក់ទំនង ក្នុងនាមជាប្រទេស ជិតខាងថែមទៀតផង ។
ជនជាតិអាស៊ី ជាពិសេសជនជាតិខ្មែរ និងជនជាតិថៃ មានប្រពៃណីគោរពយ៉ាងខ្ពង់ខ្ពស់ ចំពោះអង្គព្រះមហាក្សត និងថ្នាក់ដឹកនាំកំពូលរបស់ប្រទេស ក្នុងហេតុផលនេះហើយបានជាថ្នាក់ដឹកនាំកំពូលកម្ពុជា តែងតែអំពាវនាវដល់ ប្រជាពលរដ្ឋខ្មែរ សូមកុំយកព្រះឆាយាំលក្ខណ៍ព្រះមហាក្សត្រ និងរូបថតថ្នាក់ដឹកនាំថៃ ទៅធ្វើសកម្មភាពណាមួយ ដែលមិនគួរគប្បី និងសូមកុំឱ្យមានការរើសអើងចំពោះប្រជាជនថៃដែលកំពុងស្នាក់នៅ និងប្រកបមុខរបរនៅកម្ពុជា។ ផ្ទុយមកវិញជនជាតិថៃ មួយចំនួនបានប្រព្រឹត្តិអំពើអសីលធម៌ និងប្រមាថចំពោះថ្នាក់ដឹកនាំកម្ពុជាដោយចំហរ ប៉ុន្តែបែរ ជាគ្មានវិធានការអ្វីទាំងអស់ចំពោះបុគ្គលទាំងនោះ។
ជាថ្មីម្តងទៀត យើងខ្ញុំទាំងអស់គ្នា សូមថ្កោលទោសចំពោះទង្វើអសីលធម៌ ខ្វះសេចក្តីថ្លៃថ្នូររបស់ជនជាតិថៃមួយ ចំនួន និងសូមប្តេជ្ញាគាំទ្ររាល់វិធានការណ៍ និងគោលការណ៍ របស់រាជរដ្ឋាភិបាលកម្ពុជា ក្នុងការដោះស្រាយបញ្ហា ព្រំដែន តាមច្បាប់ និងគោលការណ៍អន្តរជាតិជាធរមាន និងអនុវត្តតាម ប្រសាសន៍ណែនាំដ៏ខ្ពង់ខ្ពស់បំផុតរបស់ សម្ដេចតេជោ ប្រធានគណបក្ស និងជាប្រធានព្រឹទ្ធសភា និងសម្តេចធិបតី នាយករដ្ឋមន្ត្រីនៃ ព្រះរាជាណាចក្រកម្ពុជា ដោយមិនប្រព្រឹត្តិ ទង្វើអសីលធម៌ ខ្វះសេចក្ដីថ្លៃថ្នូរតបតទៅលើព្រះមហាក្សត្រ ថ្នាក់ដឹកនាំ និងប្រជាជនថៃនោះឡើយ៕
