ចិនទិញមាសពីរុស្ស៊ី ឡើងដល់កម្រិតខ្ពស់ នៅក្នុងខែវិច្ឆិកា ក្នុងតម្លៃជាង៩៦០លានដុល្លារ
បរទេស៖ សារព័ត៌មាន RIA Novosti រាយការណ៍ដោយដកស្រង់ទិន្នន័យគយចិនថា ប្រទេសចិនបានទិញមាសពីប្រទេសរុស្ស៊ីក្នុងខែវិច្ឆិកាឡើងដល់កម្រិតខ្ពស់ជាមួយនឹងការនាំចេញកើនឡើងដល់ជិត ១ ពាន់លានដុល្លារ។
យោងតាមសារព័ត៌មាន RT ចេញផ្សាយនៅថ្ងៃទី២២ ខែធ្នូ ឆ្នាំ២០២៥ បានឱ្យដឹងថា ការលក់មាសរបស់រុស្ស៊ីទៅកាន់ប្រទេសចិនមានតម្លៃ ៩៦១ លានដុល្លារក្នុងខែវិច្ឆិកា បន្ទាប់ពីខែតុលាសរុបចំនួន ៩៣០ លានដុល្លារ ខណៈដែលទីក្រុងម៉ូស្គូបង្កើនកិច្ចខិតខំប្រឹងប្រែងដើម្បីផ្លាស់ប្តូរការនាំចេញមាសចេញពីទីផ្សារលោកខាងលិចដោយសារតែការដាក់ទណ្ឌកម្មដ៏ខ្លាំងក្លាប្រឆាំងនឹងរុស្ស៊ី និងខណៈដែលប្រទេសចិនក្លាយជាគោលដៅសំខាន់។
កាលពីខែតុលា និងខែវិច្ឆិកាឆ្នាំមុន រុស្ស៊ីមិនបានដឹកជញ្ជូនមាសណាមួយទៅប្រទេសចិនទេ ហើយចំនួនសរុបប្រចាំឆ្នាំខ្ពស់បំផុតរបស់ខ្លួនគឺត្រឹមតែ ២២៣ លានដុល្លារប៉ុណ្ណោះ។ ក្នុងរយៈពេល ១១ ខែដំបូងនៃឆ្នាំ២០២៥ ការនាំចូលមាសរបស់ចិនពីរុស្ស៊ីបានកើនឡើងដល់ ១,៩ ពាន់លានដុល្លារ ដែលស្ទើរតែប្រាំបួនដងនៃតម្លៃដែលបានកត់ត្រាក្នុងរយៈពេលដូចគ្នាកាលពីឆ្នាំមុន, នេះបើយោងតាមទិន្នន័យគយដែលបានដកស្រង់។ ទិន្នន័យបង្ហាញថា ការនាំចេញលោហៈមានតម្លៃសរុបរបស់រុស្ស៊ីទៅកាន់ប្រទេសចិនបានកើនឡើងទ្វេដងធៀបនឹងឆ្នាំមុន។
អ្នកវិភាគនិយាយថា ទំហំពិតនៃការទិញរបស់ចិនអាចខ្ពស់ជាងទិន្នន័យផ្លូវការចង្អុលបង្ហាញ។ យ៉ាងណាក៏ដោយ សារព័ត៌មាន Bloomberg បានប៉ាន់ប្រមាណថា ការនាំចេញមាសរបស់រុស្ស៊ីទៅកាន់ប្រទេសចិនមានប្រហែល ១ ពាន់លានដុល្លារក្នុងឆមាសទីមួយនៃឆ្នាំ ២០២៥ ដោយមិនបានបញ្ជាក់ថាចំនួនសរុបជាមាសនោះទេ៕
ប្រែសម្រួលៈ ណៃ តុលា
