លោក ហ្សេឡនស្គី បង្ហាញឆន្ទៈក្នុងការនាំយកផែនការសន្តិភាព សម្រាប់ការបោះឆ្នោតប្រជាមតិ ប្រសិនបើរុស្ស៊ីយល់ព្រមលើបទឈប់បាញ់រយៈពេល ៦០ថ្ងៃ
វ៉ាស៊ីនតោន៖ ប្រធានាធិបតីអ៊ុយក្រែន លោក វូឡូឌីមៀ ហ្សេឡិនស្គី បានឧ្យដឹងថា លោកមានឆន្ទៈក្នុងការនាំយកផែនការសន្តិភាពដើម្បីបញ្ចប់វិបត្តិអ៊ុយក្រែន សម្រាប់ការបោះឆ្នោតប្រជាមតិ ប្រសិនបើរុស្ស៊ីយល់ព្រមលើបទឈប់បាញ់យ៉ាងហោចណាស់ ៦០ថ្ងៃ នេះបើយោងតាមប្រព័ន្ធផ្សព្វផ្សាយអាមេរិក Axios។
នៅក្នុងបទសម្ភាសន៍តាមទូរស័ព្ទជាមួយ Axios កាលពីថ្ងៃសុក្រ លោក ហ្សេឡនស្គី បានឧ្យដឹងថា លោកនៅតែចង់ចរចាជំហរកាន់តែប្រសើរលើទឹកដី ប៉ុន្តែប្រសិនបើផែនការនេះទាមទារការសម្រេចចិត្ត “ដ៏លំបាកមួយ” លើបញ្ហានោះ លោកជឿថាផ្លូវដ៏ល្អបំផុតឆ្ពោះទៅមុខ គឺត្រូវដាក់ផែនការ ២០ចំណុចទាំងមូលទៅក្នុងការបោះឆ្នោតប្រជាមតិ។
លោកបានលេីកឡេីងថា បទឈប់បាញ់រយៈពេល ៦០ថ្ងៃដើម្បីរៀបចំ និងធ្វើការបោះឆ្នោត “គឺជាអប្បបរមា” ព្រោះការបោះឆ្នោតប្រជាមតិបែបនេះនឹងមានផលវិបាកនយោបាយ ភស្តុភារ និងសន្តិសុខធំៗ។
មន្ត្រីជាន់ខ្ពស់អាមេរិកម្នាក់បានប្រាប់ Axios ថា រុស្ស៊ីយល់ពីតម្រូវការសម្រាប់បទឈប់បាញ់ ប្រសិនបើលោក ហ្សេឡិនស្គី អំពាវនាវឱ្យមានការធ្វើប្រជាមតិ ប៉ុន្តែចង់បានពេលវេលាកំណត់ខ្លីជាងនេះ។
លោក ហ្សេឡិនស្គី បានបញ្ជាក់ថា លោកសង្ឃឹមថានឹងយល់ស្របជាមួយប្រធានាធិបតីអាមេរិក លោក ដូណាល់ ត្រាំ លើក្របខ័ណ្ឌសម្រាប់បញ្ចប់វិបត្តិ នៅពេលដែលពួកគេជួបគ្នានៅរដ្ឋ Florida សហរដ្ឋអាមេរិកនៅថ្ងៃអាទិត្យ៕
ប្រែសម្រួល ឈូក បូរ៉ា
