ប្រមុខអង្គការ សហប្រជាជាតិ ចេញមកថ្កោលទោស ការវាយប្រហារលើវិហារ អ៊ីស្លាមនៅក្នុងប្រទេសស៊ីរី
បរទេស៖ទីភ្នាក់ងារចិនស៊ិនហួ ចេញផ្សាយនៅថ្ងៃនេះបានឲ្យដឹងថា អគ្គលេខាធិការអង្គការ សហប្រជាជាតិ លោក Antonio Guterres កាលពីថ្ងៃសុក្រ បានថ្កោលទោសយ៉ាងដាច់អហង្ការ ចំពោះការវាយប្រហារភេរវកម្ម ដ៏សាហាវទៅលើវិហារអ៊ីស្លាម មួយកន្លែងក្នុងទីក្រុង Homs ប្រទេសស៊ីរី។
ការវាយប្រហារនេះបានកើតឡើងក្នុង អំឡុងពេលអធិស្ឋាន កាលពីថ្ងៃសុក្រ នៅឯវិហារអ៊ីស្លាម Ali Bin Abi Talib ក្នុងសង្កាត់ Wadi al-Dahab នៃទីក្រុង Homs នេះបើយោងតាមសេចក្តីថ្លែងការណ៍ ដែលចេញផ្សាយដោយអ្នក នាំពាក្យលោក Stephane Dujarric ។
សេចក្តីថ្លែងការណ៍បាននិយាយថា លោក Guterres បានរំលឹកឡើងវិញថា ការវាយប្រហារប្រឆាំងនឹងជនស៊ីវិល និងកន្លែងគោរពបូជា គឺមិនអាចទទួលយកបានឡើយ ដោយសង្កត់ធ្ងន់ថា អ្នកទទួលខុសត្រូវត្រូវតែកំណត់អត្តសញ្ញាណ និងនាំយកមកកាត់ទោស។
អគ្គលេខាធិការសូមចូល រួមរំលែកទុក្ខដល់គ្រួសារអ្នកស្លាប់ និងសម្តែងការអាណិតអាសូរចំពោះអ្នករងរបួសទាំងអស់ ដោយជូនពរឱ្យពួកគេឆាប់ជាសះស្បើយ និងពេញលេញ ផងដែរ។
គួរឲ្យដឹងដែឬថាអាជ្ញាធរសុខាភិបាល ស៊ីរីបាននិយាយកាលពីថ្ងៃសុក្រថា ចំនួនអ្នកស្លាប់ដោយសារការផ្ទុះ ដែលបានវាយប្រហារវិហារអ៊ីស្លាម បានកើនឡើងដល់៨នាក់ហើយ៕
ប្រែសម្រួល៖ស៊ុនលី
