ចិនប្រកាសធ្វើសមយុទ្ធយោធាទ្រង់ទ្រាយធំ ជុំវិញកោះតៃវ៉ាន់ក្នុងសប្តាហ៍នេះ បន្ទាប់ពីការកត់សម្គាល់របស់នាយករដ្ឋមន្ត្រីជប៉ុន កាលពីដើមខែមុន
បរទេស៖ យោធាចិនបាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា ប្រទេសចិននឹងធ្វើសមយុទ្ធយោធាទ្រង់ទ្រាយធំនៅជុំវិញកោះតៃវ៉ាន់នៅថ្ងៃអង្គារនេះ នៅក្នុងសមយុទ្ធលើកដំបូងចាប់តាំងពីការកត់សម្គាល់របស់នាយករដ្ឋមន្ត្រីជប៉ុនលោកស្រី Sanae Takaichi កាលពីដើមខែមុនថា ប្រទេសជប៉ុនអាចធ្វើអន្តរាគមន៍ផ្នែកយោធានៅក្នុងវិបត្តិលើកោះប្រជាធិបតេយ្យ។
យោងតាមសារព័ត៌មាន Japan Times ចេញផ្សាយនៅថ្ងៃទី២៩ ខែធ្នូ ឆ្នាំ២០២៥ បានឱ្យដឹងថា លោកវរសេនីយ៍ឯក Shi Yi បាននិយាយថា សមយុទ្ធដែលមានរហស្សនាមថា “បេសកកម្មយុត្តិធម៌ 2025” នឹងមានការចូលរួមពីកងទ័ព កងទ័ពជើងទឹក កងទ័ពអាកាស និងកងកម្លាំងរ៉ុក្កែតរបស់ប្រទេសចិន។ នៅក្នុងសេចក្តីថ្លែងការណ៍ដាច់ដោយឡែកមួយ យោធាចិនបានបញ្ចេញរូបភាពដែលបង្ហាញពីតំបន់ចំនួនប្រាំជុំវិញកោះតៃវ៉ាន់ ដែលនឹងស្ថិតនៅក្រោមការរឹតបន្តឹងដែនសមុទ្រ និងដែនអាកាស។
លោក Yi បាននិយាយថា “សមយុទ្ធនេះនឹងផ្តោតលើប្រធានបទនៃការល្បាតត្រៀមខ្លួនប្រយុទ្ធតាមអាកាស ការចាប់យករួមគ្នានៃឧត្តមភាពដ៏ទូលំទូលាយ ការបិទច្រកនៅលើកំពង់ផែ និងតំបន់សំខាន់ៗ ក៏ដូចជាការរារាំងគ្រប់វិមាត្រនៅខាងក្រៅខ្សែសង្វាក់កោះ”៕
ប្រែសម្រួលៈ ណៃ តុលា
