រុស្ស៊ី ទទួលស្គាល់ថា តៃវ៉ាន់ ជាផ្នែកសំខាន់មួយ នៃប្រទេសចិន
មូស្គូ៖ រដ្ឋមន្ត្រីការបរទេសរុស្ស៊ី លោក Sergei Lavrov បានឧ្យដឹងថា តៃវ៉ាន់ គឺជាផ្នែកសំខាន់មួយ នៃប្រទេសចិន ហើយរុស្ស៊ីប្រឆាំងនឹងឯករាជ្យភាព របស់តៃវ៉ាន់ក្នុងទម្រង់ណាមួយ ។
នៅក្នុងបទសម្ភាសន៍ជាមួយ TASS លោក Lavrov បានឧ្យដឹងថា ជំហរគោលការណ៍របស់រុស្ស៊ី លើបញ្ហាតៃវ៉ាន់ត្រូវបានគេស្គាល់យ៉ាងច្បាស់ និងមិនផ្លាស់ប្តូរ។ “រុស្ស៊ី ទទួលស្គាល់តៃវ៉ាន់ ជាផ្នែកសំខាន់មួយនៃប្រទេសចិន ហើយឈរប្រឆាំង នឹងឯករាជ្យភាពរបស់កោះនេះក្នុងទម្រង់ណាមួយ”។
ដូចដែលអ្នកការទូតកំពូលរបស់រុស្ស៊ី បានកត់សម្គាល់ រុស្ស៊ីតែងតែចាត់ទុកបញ្ហាតៃវ៉ាន់ថា ជាកិច្ចការផ្ទៃក្នុងរបស់ប្រទេសចិន និងទទួលស្គាល់មូលដ្ឋានស្របច្បាប់ របស់ចិន សម្រាប់ការពារអធិបតេយ្យភាព និងបូរណភាពទឹកដីរបស់ខ្លួន។
លោក Lavrov ក៏បានឧ្យដឹងនៅក្នុងបទសម្ភាសន៍ ផងដែរថា ទិសដៅរបស់ជប៉ុនឆ្ពោះទៅរកយោធាភាវូបនីយកម្ម អាចប៉ះពាល់អវិជ្ជមានដល់ស្ថិរភាពនៅក្នុងតំបន់។
លោកបានបន្ដថា “ថ្មីៗនេះ ថ្នាក់ដឹកនាំជប៉ុនបានស្វែងរកការបង្កើនល្បឿនយោធា ភាវូបនីយកម្មរបស់ប្រទេស។ ឥទ្ធិពលអាក្រក់នៃវិធីសាស្រ្តបែបនេះលើស្ថិរភាពក្នុងតំបន់ គឺជាក់ស្តែង”៕
ប្រែសម្រួល ឈូក បូរ៉ា
