កងទ័ពរុស្ស៊ី កាន់កាប់បានទីក្រុង Kupyansk និងបន្ដវាយប្រហារ ហេដ្ឋារចនាសម្ព័ន្ធយោធា អ៊ុយក្រែន
មូស្គូ៖ កងទ័ពរុស្ស៊ី កាន់កាប់ការគ្រប់គ្រង ទីក្រុងយុទ្ធសាស្ត្រ Kupyansk ក្នុងតំបន់ Kharkiv និងបានធ្វើការវាយប្រហារ ទ្រង់ទ្រាយធំមួយលើគោលដៅ ទាក់ទងនឹងយោធាអ៊ុយក្រែន ពេញមួយយប់ នេះបើយោងតាមការចុះ ផ្សាយរបស់ទីក្រុងមូស្គូ។
ក្រសួងការពារជាតិរុស្ស៊ីបានឧ្យដឹង នៅក្នុងសេចក្តីថ្លែងការណ៍មួយថា ការវាយឆ្មក់នេះត្រូវបានធ្វើឡើង «ជាការឆ្លើយតបទៅនឹងការ វាយប្រហារភេរវកម្ម ដែលធ្វើឡើងដោយរបបគៀវ ប្រឆាំងនឹងកន្លែងស៊ីវិលនៅលើទឹកដីរុស្ស៊ី»។
កងកម្លាំងរុស្ស៊ីបានប្រើប្រាស់អាវុធ ដែលមានភាពជាក់លាក់ខ្ពស់ រយៈចម្ងាយឆ្ងាយពីវេទិកាដីគោក អាកាស និងសមុទ្រ រួមទាំងមីស៊ីល Kinzhal ដែលមានល្បឿន លឿនជាងសំឡេង ដើម្បីវាយប្រហារហេដ្ឋារចនាសម្ព័ន្ធ ថាមពលដែលគាំទ្រដល់ប្រតិបត្តិការយោធាអ៊ុយក្រែន និងឧស្សាហកម្មការពារជាតិ។
សេចក្តីថ្លែងការណ៍នេះបានឧ្យដឹងថា ការវាយប្រហារនេះសម្រេច បាននូវគោលបំណងរបស់ខ្លួន ដោយគោលដៅ ដែលបានកំណត់ទាំងអស់ត្រូវបានវាយ ប្រហារដោយជោគជ័យ។
ទន្ទឹមនឹងនេះដែរ Kupyansk នៅតែស្ថិតនៅក្រោម ការគ្រប់គ្រង របស់កងទ័ពរុស្ស៊ី បន្ទាប់ពីពួកគេបាន វាយបកអ៊ុយក្រែន ចំនួន ៥លើកក្នុងរយៈពេលពីរ ថ្ងៃកន្លងមក នេះបើយោងតាមលោក Ivan Bigma អ្នកនាំពាក្យនៃក្រុមកងកម្លាំង ខាងលិចរបស់រុស្ស៊ី៕
