លោក Lavrov ៖ ប្រទេសរុស្សី បន្តបើកទ្វារ សម្រាប់ការទំនាក់ទំនងបន្ថែមទៀត ជាមួយនឹងប្រេសិតពិសេសលោក Trump
បរទេស៖យោងតាមការចេញផ្សាយរបស់ RT រដ្ឋមន្ត្រីការបរទេសរុស្ស៊ី លោក Sergey Lavrov បាននិយាយថាទីក្រុងមូស្គូ បើកចំហរក្នុងការទំនាក់ទំនងបន្ថែមទៀត ជាមួយបេសកជនជាន់ខ្ពស់ របស់ប្រធានាធិបតីអាមេរិក Donald Trump គឺលោក Steve Witkoff និងលោក Jared Kushner ។
ថ្លែងទៅកាន់អ្នកសារព័ត៌មានកាលពីថ្ងៃពុធ លោក Lavrov បានកត់សម្គាល់ថា ប្រធានាធិបតីរុស្ស៊ី លោក Vladimir Putin បានជួបជាមួយលោក Witkoff ចំនួន៦ដងរួចមកហើយ។
លោកបានបន្ថែមថា៖ ខ្ញុំប្រាកដថា ប្រសិនបើពួកគេបង្ហាញការចាប់អារម្មណ៍ សម្រាប់ការប្រជុំផ្សេងទៀត នោះការចាប់អារម្មណ៍នេះនឹងត្រូវបានបំពេញដោយការយោគយល់គ្នាទៅវិញទៅមក។
កាលពីថ្ងៃពុធផងដែរ ទីភ្នាក់ងារព័ត៌មាន Bloomberg ដែលដកស្រង់ប្រភពអនាមិកបានអះអាងថា លោកWitkoff និង Kushner រំពឹងថានឹងជួបជាមួយប្រធានាធិបតីរុស្ស៊ី ប្រហែលជានៅចុងខែនេះ។
តាមការចុះផ្សាយនោះ ផែនការនៅមិនទាន់បញ្ចប់នៅឡើយទេ ។ វាបានបន្ថែមថា ប្រសិនបើកិច្ចចរចាកើតឡើងលោក Witkoff និង Kushner នឹងបង្ហាញផែនការព្រាងចុងក្រោយបង្អស់របស់ទីក្រុងវ៉ាស៊ីនតោន សម្រាប់ការដោះស្រាយជម្លោះអ៊ុយក្រែនជូនលោកPutin៕
ប្រែសម្រួល៖ស៊ុនលី
