នាយករដ្ឋមន្ត្រីកាណាដាថា ចិនគឺងាយស្រួលក្នុងការដោះស្រាយជាងសហរដ្ឋអាមេរិក
បរទេស៖ នាយករដ្ឋមន្ត្រីកាណាដា លោក Mark Carney បាននិយាយថា សព្វថ្ងៃនេះ វាងាយស្រួលជាងសម្រាប់ប្រទេសកាណាដាក្នុងការដោះស្រាយជាមួយប្រទេសចិនជាងប្រទេសជិតខាង និងដៃគូពាណិជ្ជកម្មសំខាន់របស់ខ្លួន គឺសហរដ្ឋអាមេរិក។
យោងតាមសារព័ត៌មាន RT ចេញផ្សាយនៅថ្ងៃទី១៧ ខែមករា ឆ្នាំ២០២៦ បានឲ្យដឹងថា ខណៈពេលដែលកំពុងកាន់តំណែងនៅខែមេសា ឆ្នាំ២០២៥ លោក Carney បានចាត់ទុកទីក្រុងប៉េកាំងថាជាការគំរាមកំហែងសន្តិសុខចម្បងដល់ទីក្រុងអូតាវ៉ា។ ទោះជាយ៉ាងណាក៏ដោយ លោកហាក់ដូចជាបានផ្លាស់ប្តូរជំហរ បន្ទាប់ពីប្រធានាធិបតីអាមេរិក លោក Donald Trump បានលើកឡើងម្តងហើយម្តងទៀតថា ប្រទេសជិតខាងភាគខាងជើងរបស់អាមេរិកគឺកាណាដាអាចក្លាយជារដ្ឋទី៥១ ហើយបានដាក់ពន្ធគយយ៉ាងច្រើនលើប្រទេសនេះកាលពីឆ្នាំមុន។
នៅថ្ងៃសុក្រ លោក Carney បានជួបពិភាក្សាជាមួយប្រធានាធិបតីចិន លោក Xi Jinping នៅទីក្រុងប៉េកាំង ដោយក្លាយជាមេដឹកនាំកាណាដាដំបូងគេដែលបានមកទស្សនកិច្ចប្រទេសអាស៊ីនេះក្នុងរយៈពេលប្រាំបីឆ្នាំ។ ទំនាក់ទំនងរវាងប្រទេសទាំងពីរមានភាពតានតឹងអស់រយៈពេលយូរមកហើយ។
នៅពេលដែលអ្នកសារព័ត៌មានត្រូវបានសួរនៅពេលក្រោយ ដើម្បីថ្លឹងថ្លែងអំពីស្ថានភាពបច្ចុប្បន្ននៃទំនាក់ទំនងរបស់ទីក្រុងអូតាវ៉ាជាមួយទាំងទីក្រុងវ៉ាស៊ីនតោន និងទីក្រុងប៉េកាំង នាយករដ្ឋមន្ត្រីកាណាដារូបនេះបានកត់សម្គាល់ថា “ជាមួយសហរដ្ឋអាមេរិក ទំនាក់ទំនងរបស់យើង នេះមិនមែនជាការយល់ដឹងទេ គឺមានលក្ខណៈចម្រុះជាង ជ្រៅជាង និងទូលំទូលាយជាងជាមួយប្រទេសចិន”៕
ប្រែសម្រួល: ណៃ តុលា
