វៀតណាម ដាក់ពង្រាយក្រុមអ្នកលបបាញ់ នៅលើដំបូល ២៤ម៉ោង ខណៈដែលសន្តិសុខ ត្រូវបានរឹងបន្តឹងខ្លាំង អំឡុងពេលសមាជ បក្សជាតិលើកទី១៤
បរទេស ៖ ក្រុមអ្នកលបបាញ់ពិសេស ឬ sniper ត្រូវបានដាក់ពង្រាយនៅលើដំបូល និងទីតាំងខ្ពស់ៗនៅទូទាំងកណ្តាល ទីក្រុងហាណូយ ខណៈដែលប្រទេសវៀតណាម កំពុងបង្កើនសន្តិសុខ សម្រាប់សមាជបក្សជាតិលើកទី១៤ ដោយរក្សាការឃ្លាំមើលពេញម៉ោង លើទីកន្លែងសំខាន់ៗ។
យោងតាមសារព័ត៌មាន VN Express ចេញផ្សាយនៅថ្ងៃទី២២ ខែមករា ឆ្នាំ២០២៦ បានឱ្យដឹងថា ចាប់តាំងពីសមាជបានបើកមក អង្គភាពប៉ូលីសពិសេសក្រោមក្រសួងសន្តិសុខ សាធារណៈត្រូវបានដាក់ពង្រាយ ២៤ ម៉ោងក្នុងមួយថ្ងៃ នៅចំណុចខ្ពស់សំខាន់ៗ ដែលមើលទីកន្លែងដែលភ្ជាប់ទៅព្រឹត្តិការណ៍នេះ ។ ពីចំណុចមើលឃើញទាំងនេះ មន្ត្រីត្រួតពិនិត្យបរិវេណសន្តិសុខទាំងមូល ស្កេនរកការគំរាមកំហែង ដែលអាចកើតមាន ។
ក្រុមទាំងនេះធ្វើការជាវេនប្តូរវេន ដោយរួមបញ្ចូលគ្នានូវការគ្របដណ្តប់ របស់អ្នកលបបាញ់ជាមួយនឹងការឃ្លាំមើលរយៈកម្ពស់ខ្ពស់ និងការសង្កេតជាបន្តបន្ទាប់។ យោងតាមមន្ត្រីសន្តិសុខ គឺការងារនេះតម្រូវឱ្យមានភាពជាក់លាក់ខ្ពស់ វិន័យ និងការគ្រប់គ្រងផ្លូវចិត្ត ដោយសូម្បីតែកំហុសតូចតាចក៏ត្រូវបានចាត់ទុកថា មិនអាចទទួលយកបានដែរ ។
គ្រប់មុខតំណែង និងវេនភារកិច្ចត្រូវបាន គណនាយ៉ាងប្រុងប្រយ័ត្នដើម្បីបង្កើតស្រទាប់ការពារច្រើនជាន់គ្នា បង្កើតបានជាបណ្តាញសន្តិសុខ បិទជិតយ៉ាងតឹងរ៉ឹងនៅជុំវិញសមាជ ។
សូមជម្រាបថា សមាជបក្សទូទាំងប្រទេសលើកទី១៤ គឺប្រព្រឹត្តទៅចាប់ពីថ្ងៃទី១៩ ខែមករា ដល់ថ្ងៃទី២៣ ខែមករា ឆ្នាំ២០២៦។ ខ្លីជាងការគ្រោងទុកដំបូង ១.៥ថ្ងៃ។ ព្រឹត្តិការណ៍នេះប្រមូលផ្តុំប្រតិភូចំនួន ១.៥៨៦នាក់ ដែលតំណាងឱ្យសមាជិកបក្សជាង ៥.៦លាននាក់ទូទាំងប្រទេស រួមជាមួយវីរនារីវៀតណាម អ្នកបញ្ញវន្តល្បីៗ វិចិត្រករ ឥស្សរជនសាសនា ពលរដ្ឋវ័យក្មេងឆ្នើម និងតំណាងនៃបេសកកម្មការទូតបរទេស និងអង្គការអន្តរជាតិនៅវៀតណាម៕
