ប្រធានាធិបតីកូឡុំប៊ី បង្ហាញសុទិដ្ឋិនិយមចំពោះកិច្ចប្រជុំដ៏មានហានិភ័យ នៅសេតវិមានជាមួយប្រធានាធិបតីអាមេរិក លោក Donald Trump នៅថ្ងៃទី ៣ ខែកុម្ភៈ
បរទេស៖ ប្រធានាធិបតីកូឡុំប៊ី លោក Gustavo Petro បាននិយាយកាលពីថ្ងៃសុក្រថា លោកមានសុទិដ្ឋិនិយមចំពោះកិច្ចប្រជុំដ៏មានហានិភ័យនៅសេតវិមានជាមួយប្រធានាធិបតីអាមេរិក លោក Donald Trump ដែលគ្រោងធ្វើឡើងនៅថ្ងៃទី ៣ ខែកុម្ភៈខាងមុខនេះ។ ការប្រកាសនេះបង្ហាញពីការថយចុះគួរឱ្យកត់សម្គាល់បន្ទាប់ពីការប្រទូស្តរ៉ាយអស់រយៈពេលជាច្រើនខែ ដែលបានឃើញសហរដ្ឋអាមេរិកដកហូតទិដ្ឋាការរបស់លោក Petro និងដាក់ទណ្ឌកម្មលើលោក និងក្រុមគ្រួសាររបស់លោក ជុំវិញការចោទប្រកាន់ពីបទជួញដូរគ្រឿងញៀនដែលមិនបានបញ្ជាក់។
យោងតាមសារព័ត៌មាន AP ចេញផ្សាយនៅថ្ងៃទី២៤ ខែមករា ឆ្នាំ២០២៦ បានឱ្យដឹងថា លោក Petro បាននិយាយនៅក្នុងសារខ្លីមួយនៅលើ X បន្ទាប់ពីដកស្រង់សេចក្តីប្រកាសពីក្រសួងការបរទេសទាក់ទងនឹងការរៀបចំសម្រាប់កិច្ចប្រជុំថា “ការចរចាកំពុងដំណើរការទៅដោយរលូន”។
នៅក្នុងការផ្លាស់ប្តូរការទូតដ៏សំខាន់មួយ រដ្ឋមន្ត្រីការបរទេសកូឡុំប៊ី លោកស្រី Rosa Villavicencio និងរដ្ឋមន្ត្រីការបរទេសអាមេរិក លោក Marco Rubio បានធ្វើការហៅទូរស័ព្ទដោយស្និទ្ធស្នាលដើម្បីបញ្ចប់ការរៀបចំកិច្ចជំនួបនេះ។
យោងតាមលោក Tommy Pigott អ្នកនាំពាក្យក្រសួងការបរទេសអាមេរិក, លោក Rubio បានបញ្ជាក់ក្នុងអំឡុងពេលផ្លាស់ប្តូរព័ត៌មានកាលពីថ្ងៃសុក្រថា ប្រធានាធិបតីកូឡំប៊ីលោក Petro នឹងទទួលបានការធានាការទូតពេញលេញ ដែលជាការផ្លាស់ប្តូរយ៉ាងខ្លាំងពីខែកញ្ញា នៅពេលដែលទីក្រុងវ៉ាស៊ីនតោនបានគំរាមកំហែងដកហូតទិដ្ឋាការរបស់លោក Petro បន្ទាប់ពីការរិះគន់របស់លោកចំពោះគោលនយោបាយការបរទេសរបស់សហរដ្ឋអាមេរិកនៅក្នុងការជួបជុំគ្នានៅទីក្រុងញូវយ៉ក៕
ប្រែសម្រួលៈ ណៃ តុលា
