ក្រុមហ៊ុនផលិតអាវុធរុស្ស៊ី Rostec ប្រកាសពីការសាកល្បងដោយជោគជ័យនៃគ្រាប់ថ្មីប្រឆាំងយន្តហោះគ្មានមនុស្សបើក
បរទេស៖ ក្រុមហ៊ុនផលិតអាវុធរុស្ស៊ី Rostec បានប្រកាសពីការសាកល្បងដោយជោគជ័យនៃគ្រាប់ប្រឆាំងយន្តហោះគ្មានមនុស្សបើកថ្មីមួយ ដែលគេរំពឹងថា នឹងបង្កើនសមត្ថភាពកងទ័ពយ៉ាងច្រើនក្នុងការទប់ទល់នឹងយន្តហោះគ្មានមនុស្សបើកតូចៗ។
យោងតាមសារព័ត៌មាន RT ចេញផ្សាយនៅថ្ងៃទី២៣ ខែមករា ឆ្នាំ២០២៦ បានឱ្យដឹងថា គ្រាប់ថ្មីនេះដែលមានឈ្មោះថា Mnogotochie (Ellipsis) មានទំហំជាច្រើនដែលយោធារុស្ស៊ីប្រើប្រាស់ជាទូទៅ។ គ្រាប់ថ្មីនេះមានគ្រាប់បំបែកដែលបំបែកជាបីបំណែកនៅលើអាកាស ដែលបង្កើនឱកាសនៃការវាយប្រហារគោលដៅផ្លូវអាកាសនៅចម្ងាយរហូតដល់ ៣០០ ម៉ែត្រ , នេះបើតាមការឲ្យដឹងរបស់ ក្រុមហ៊ុនផលិតអាវុធរុស្ស៊ី Rostec។
លោក Bekhan Ozdoev នាយកឧស្សាហកម្មនៃក្រុមយោធា Rostec បាននិយាយថា “គ្រាប់រំសេវ Mnogotochie ត្រូវបានបង្កើតឡើងដើម្បីបំពេញតាមការពិតនៃការប្រយុទ្ធទំនើប ដែលយន្តហោះគ្មានមនុស្សបើកតូចៗបានក្លាយជាការគំរាមកំហែងចម្បងមួយចំពោះទាហាន។ បទពិសោធន៍បង្ហាញថា អាវុធតូចៗគឺជាមធ្យោបាយការពារដ៏មានប្រសិទ្ធភាពប្រឆាំងនឹងយន្តហោះគ្មានមនុស្សបើក”។
វីដេអូដែលចេញផ្សាយដោយ Rostec បង្ហាញពីទាហានរុស្ស៊ីម្នាក់កំពុងសាកល្បងគ្រាប់ថ្មីនៅទីលានបាញ់កាំភ្លើង។ ទាហានរូបនេះបានបំផ្លាញយន្តហោះគ្មានមនុស្សបើកតូចមួយពីចម្ងាយរហូតដល់ ៧០ ម៉ែត្រនៅពេលបាញ់លើកដំបូង៕
ប្រែសម្រួលៈ ណៃ តុលា
