សេអ៊ូល៖ ប្រភពពីមន្ត្រីបានឲ្យដឹងថា យោធារបស់ប្រទេសកូរ៉េខាងត្បូង គ្រោងនឹងធ្វើសមយុទ្ធរួមបញ្ចូលគ្នា នៅតាមសមុទ្រនៅសប្តាហ៍ក្រោយ ដែលជាផ្នែកមួយ នៃកិច្ចប្រឹងប្រែង ដែលកំពុងបន្តរបស់ខ្លួន ដើម្បីបង្កើនជំនាញ របស់កងកម្លាំងរបស់ខ្លួន។
សមយុទ្ធដែលត្រូវបាន គ្រោងទុកដំបូងកាលពីខែមុន ត្រូវបានបញ្ឈប់ដោយសារស្ថានភាព អាកាសធាតុមិនល្អ នឹងមានការចូលរួមពីកងទ័ពកងនាវាចរ និងកងទ័ពអាកាស។ សមយុទ្ធបាញ់គ្រាប់ពិត នឹងធ្វើឡើង នៅថ្ងៃទី១១ ខែមិថុនា នៅឆ្នេរមួយនៅអ៊ូជីន ចម្ងាយ ៣៣០ គីឡូម៉ែត្រ ភាគអាគ្នេយ៍ ទីក្រុងសេអ៊ូល ដែលស្ថិតនៅឆ្នេរសមុទ្រ ខាងកើត។
យោធាបានឲ្យដឹងថា ទោះបីជាមានការពន្យាពេល ក៏ដោយទំហំនៃសមយុទ្ធហ្វឹកហាត់ នឹងនៅដដែលដោយប្រព័ន្ធ បាញ់រ៉ុក្កែតរបស់កងទ័ព បានបាញ់ទៅលើគោលដៅ នៅតាមសមុទ្រ និងឧទ្ធម្ភាគចក្រវាយប្រហារ ក៏ចូលរួមក្នុងការខិតខំ ដើម្បីកំទេចសត្រូវផងដែរ៕
ដោយ ឈូក បូរ៉ា
