លោក Ferdinand Marcos Jr៖ កិច្ចព្រមព្រៀងសេដ្ឋកិច្ចឌីជីថលអាស៊ាន នឹងក្លាយជាផែនទីបង្ហាញផ្លូវសម្រាប់វិស័យ AI និងសេដ្ឋកិច្ចក្នុងតំបន់
សិង្ហបុរី៖ ប្រធានាធិបតីហ្វីលីពីន លោក Ferdinand Marcos Jr បានថ្លែងកាលពីថ្ងៃព្រហស្បតិ៍ ទី ៨ ខែតុលា ថា ការចុះហត្ថលេខាលើកិច្ចព្រមព្រៀងសេដ្ឋកិច្ចឌីជីថលជាប្រវត្តិសាស្ត្រនៅក្នុងកិច្ចប្រជុំកំពូលអាស៊ានលើកទី ៤៩ នាខែវិច្ឆិកាខាងមុខ នឹងក្លាយជាផែនទីបង្ហាញផ្លូវដ៏សំខាន់សម្រាប់បណ្តាប្រទេសក្នុងតំបន់អនុវត្តតាម ជាពិសេសក្នុងវិស័យបញ្ញាសិប្បនិម្មិត (AI) នេះបើយោងតាមការចេញផ្សាយពីសារព័ត៌មាន CNA ថ្ងៃទី៨ ខែតុលា ឆ្នាំ២០២៦។
ថ្លែងក្នុងកិច្ចសន្ទនាជាមួយលោក Steve Forbes ប្រធាន និងជានិពន្ធនាយកនៃ Forbes Media ក្នុងសន្និសីទសកល Forbes Global CEO Conference នៅប្រទេសសិង្ហបុរី លោក Marcos បានសង្កត់ធ្ងន់ថា ការពិភាក្សាជុំវិញឧស្សាហកម្មសំខាន់ៗដូចជា AI មិនអាចកំណត់ត្រឹមតែ «តំបន់មួយ ឬវិស័យមួយ» នោះឡើយ។
លោកប្រធានាធិបតីបានបញ្ជាក់ថា៖ «កិច្ចព្រមព្រៀងនេះព្យាយាមរៀបចំផែនទីបង្ហាញផ្លូវ និងជាការណែនាំអំពីអ្វីដែលយើងចង់សម្រេចបាន របៀបដែលបណ្តាប្រទេសនានានឹងចូលរួមបំពេញតួនាទីរៀងៗខ្លួន និងរបៀបដែលកិច្ចការទាំងនេះផ្សារភ្ជាប់ជាមួយពិភពលោកទាំងមូល»។
ហ្វីលីពីនដែលជាប្រធានប្តូរវេនអាស៊ាន បានបញ្ចប់ការចរចាលើ «កិច្ចព្រមព្រៀងក្របខ័ណ្ឌសេដ្ឋកិច្ចឌីជីថលអាស៊ាន» (DEFA) កាលពីខែឧសភាកន្លងទៅ។ កិច្ចព្រមព្រៀង DEFA ដែលត្រូវបានប្រកាសដំបូងក្នុងឆ្នាំ ២០២៣ នេះ មានគោលដៅបង្កើតវិធាននិងក្របខ័ណ្ឌរួម ដើម្បីជួយសម្រួលដល់ពាណិជ្ជកម្មឌីជីថល គាំទ្រដល់ការផ្ទេរទិន្នន័យឆ្លងដែនប្រកបដោយទំនុកចិត្ត ពង្រឹងការទូទាត់បែបឌីជីថល និងបង្កើនការការពារអ្នកប្រើប្រាស់តាមប្រព័ន្ធអនឡាញ។
លោក Marcos បានរំឭកថា កាលពីហ្វីលីពីនចាប់ផ្តើមទទួលតំណែងជាប្រធានអាស៊ាន លោកបានកត់សម្គាល់ឃើញថា ប្លុកនេះមិនសូវបានពិភាក្សាច្រើនអំពី AI នោះទេ ហេតុនេះលោកបានយកគំនិតបណ្តាញអគ្គិសនីអាស៊ាន (ASEAN Power Grid) មកអនុវត្តស្រដៀងគ្នាចំពោះវិស័យ AI។
ឆ្លើយតបនឹងសំណួររបស់លោក Forbes អំពីបញ្ហាពន្ធគយ លោក Marcos បានបញ្ជាក់ថា ហ្វីលីពីនត្រូវតែ «ត្រៀមខ្លួនដោះស្រាយរាល់អ្វីដែលកើតឡើង» ទោះជាពន្ធគយនោះដាក់ចេញដោយសហរដ្ឋអាមេរិក សហភាពអឺរ៉ុប ឬអង្គភាពផ្សេងទៀតក៏ដោយ។
កាលពីខែកក្កដា សហរដ្ឋអាមេរិកបានដកហូតពន្ធថ្មី ១២.៥% លើការនាំចេញរបស់ហ្វីលីពីន បន្ទាប់ពីប្រធានាធិបតី Donald Trump បានអនុម័តវិធានការលើដៃគូពាណិជ្ជកម្មនានា។ សហរដ្ឋអាមេរិក គឺជាដៃគូនាំចេញធំបំផុតរបស់ហ្វីលីពីន ដោយស្មើនឹង ១៥.៩% នៃការនាំចេញសរុបរបស់ប្រទេសនេះក្នុងឆ្នាំ ២០២៥។
លោក Marcos បានសង្កត់ធ្ងន់ថា ពាណិជ្ជកម្មគឺជាកត្តាស្នូលនៃសេដ្ឋកិច្ចជោគជ័យ ហើយហ្វីលីពីននឹងធ្វើអ្វីគ្រប់យ៉ាងដើម្បីលើកកម្ពស់ពាណិជ្ជកម្ម៖ «មិនថាការកែសម្រួល ការចរចា កិច្ចព្រមព្រៀង ឬការសម្រុះសម្រួលបែបណាដែលយើងត្រូវធ្វើនោះទេ ចូរយើងធ្វើវា ដើម្បីធានាថាពាណិជ្ជកម្មនៅតែបន្តត្រូវបានលើកទឹកចិត្ត»។
ជុំវិញបញ្ហាសមុទ្រចិនខាងត្បូង និងវឌ្ឍនភាពនៃក្រមប្រតិបត្តិ (Code of Conduct – COC) រវាងអាស៊ាន និងចិន លោក Marcos បានលើកឡើងថា ភាគីពាក់ព័ន្ធកំពុងសម្រេចបាន «វឌ្ឍនភាពល្អ» ប៉ុន្តែលោកមិនបានលម្អិតបន្ថែមលើការចរចានោះទេ។
លោកបានថ្លែងថា៖ «យើងត្រូវតែរក្សាសេរីភាពនៃការធ្វើនាវាចរណ៍ មិនត្រឹមតែសម្រាប់យើងប៉ុណ្ណោះទេ ប៉ុន្តែសម្រាប់ពិភពលោកទាំងមូល។ ដូច្នេះហើយ ទើបក្រមប្រតិបត្តិនេះមានសារៈសំខាន់ជាពិសេស ហើយជាមូលហេតុដែលយើងនៅតែបន្តមានសុទិដ្ឋិនិយម»។
លោក Marcos ក៏បានសម្តែងការព្រួយបារម្ភផងដែរថា កំហុសឆ្គងណាមួយពីបុគ្គលិកនៅទីតាំងផ្ទាល់ អាចបណ្តាលឱ្យមានរឿងរ៉ាវ «ដែលមិនអាចគ្រប់គ្រងបាន» ប៉ុន្តែលោកបានបញ្ជាក់ច្បាស់ពីការប្តេជ្ញាចិត្តក្នុងការឈានទៅរកកិច្ចព្រមព្រៀង និងការបន្ថយកម្តៅស្ថានការណ៍។
គួរបញ្ជាក់ថា ប្រធានាធិបតីហ្វីលីពីនកំពុងបំពេញទស្សនកិច្ចផ្លូវការលើកទី ៥ នៅប្រទេសសិង្ហបុរី ចាប់ពីថ្ងៃទី ៧ ដល់ថ្ងៃទី ១១ ខែតុលា តបតាមការអញ្ជើញរបស់នាយករដ្ឋមន្ត្រីសិង្ហបុរី លោក Lawrence Wong ដើម្បីពិភាក្សាលើកិច្ចសហប្រតិបត្តិការទ្វេភាគី និងការវិវត្តក្នុងតំបន់ ព្រមទាំងចូលរួមទស្សនាព្រឹត្តិការណ៍ Formula 1 Singapore Grand Prix ផងដែរ៕
ប្រែសម្រួល៖ គីរី
