កិច្ចព្រមព្រៀងប្រេងប្រវត្តិសាស្ត្រនៅវ៉េណេស៊ុយអេឡា កំពុងស្ថិតក្នុងភាពស្រពិចស្រពិល ផ្ទុយពីការរំពឹងទុករបស់លោក Trump
បរទេស៖ ប្រធានាធិបតី លោក Donald Trump បានហៅកិច្ចព្រមព្រៀងនេះថាជាកិច្ចព្រមព្រៀងប្រេងដ៏ធំបំផុតនៅក្នុងប្រវត្តិសាស្ត្រ៖ ទីតាំងបូមប្រេងចំនួន ១៧កន្លែងនៅវ៉េណេស៊ុយអេឡា ដែលមានទុនបម្រុងប្រមាណ ៦៤ ពាន់លានធុង (Barrels) ត្រូវបានប្រគល់ទៅឱ្យក្រុមហ៊ុនតែមួយ នេះបើយោងតាមការចេញផ្សាយពីសារព័ត៌មាន Rueters ថ្ងៃទី៣០ ខែតុលា ឆ្នាំ២០២៦ ។
ការអនុវត្តកិច្ចព្រមព្រៀងនេះ ធ្លាក់ទៅលើក្រុមហ៊ុន North American Blue Energy Partners (NABEP) ដែលជាក្រុមហ៊ុនមិនសូវមានគេស្គាល់ឈ្មោះ ដឹកនាំដោយពាណិជ្ជករវ៉េណេស៊ុយអេឡាលោក Alejandro Betancourt។ លោក Alejandro កាលពីពេលថ្មីៗនេះ ធ្លាប់ជាគោលដៅនៃការស៊ើបអង្កេតរបស់សហរដ្ឋអាមេរិកជុំវិញការលាងលុយកខ្វក់ ពាក់ព័ន្ធនឹងការកិបកេងមូលនិធិពីក្រុមហ៊ុនប្រេងរដ្ឋ PDVSA។ កិច្ចព្រមព្រៀងរបស់ក្រុមហ៊ុននេះជាមួយទីក្រុងវ៉ាស៊ីនតោន បានផ្តល់ឱ្យសហរដ្ឋអាមេរិកនូវចំណែកភាគហ៊ុន ៣៥% នៅក្នុងក្រុមហ៊ុនមេ និងសិទ្ធិទិញយក ២០% នៃទិន្នផលប្រេងក្នុងតម្លៃដើមផលិត (Production cost)។
ក្រុមហ៊ុន NABEP បានបញ្ជាក់ថា ខ្លួននឹងបង្កើនទិន្នផលប្រេងរហូតដល់ ៤ដង ពោលគឺច្រើនជាង ១ លានធុងក្នុងមួយថ្ងៃ (bpd) ដែលកើនឡើងពីប្រមាណ ២២៤.០០០ ធុងក្នុងមួយថ្ងៃ កាលពីពាក់កណ្តាលខែតុលា។
យោងតាមបទសម្ភាសន៍របស់ទីភ្នាក់ងារសារព័ត៌មាន Reuters ជាមួយបុគ្គលិកផ្នែកប្រេង ក្រុមហ៊ុនម៉ៅការ អ្នកហិរញ្ញវត្ថុ និងអ្នកជំនាញក្នុងឧស្សាហកម្មនេះចំនួន ១៥ នាក់ បានឱ្យដឹងថា ការសម្រេចគោលដៅនេះនឹងមានការលំបាកជាងអ្វីដែលលោក Trump និងក្រុមហ៊ុន NABEP បានលើកឡើងទៅទៀត។
ក្នុងចំណោមអ្នកទាំងនោះ មាន ៨ នាក់ (បុគ្គលិកនិងក្រុមហ៊ុនម៉ៅការ ៧ នាក់ និងដៃគូអាជីវកម្មម្នាក់ដែលដឹងពីប្រតិបត្តិការរបស់ NABEP) បានបញ្ជាក់ថា ក្រុមហ៊ុនកំពុងជំពាក់បំណុលក្រុមហ៊ុនម៉ៅការ ហើយកំពុងជួបការលំបាកក្នុងការជ្រើសរើសបុគ្គលិក និងជួសជុលហេដ្ឋារចនាសម្ព័ន្ធ។
សូម្បីតែតួលេខទុនបម្រុងដ៏ធំ ៦៤ ពាន់លានធុង ដែលលោក Trump បានលើកឡើង ក៏ប្រហែលជាការបំប៉ោងលើសការពិតផងដែរ។ លោក Francisco Monaldi នាយកកម្មវិធីថាមពលអាមេរិកឡាទីននៅវិទ្យាស្ថាន Baker នៃសាកលវិទ្យាល័យ Rice បានប្រាប់ Reuters ថា ជាការពិត មានតែប្រេងប្រមាណ ១០ ពាន់លានធុងប៉ុណ្ណោះដែលអាចអភិវឌ្ឍបាន ក្នុងអាណត្តិរយៈពេល ២៥ ឆ្នាំ ដែលច្បាប់របស់វ៉េណេស៊ុយអេឡាអនុញ្ញាតសម្រាប់គម្រោងប្រេង។ លោកបានបញ្ជាក់ថា៖ “នោះលុះត្រាតែអ្វីៗគ្រប់យ៉ាងដំណើរការទៅដោយរលូន”។
លោក Terry Wade អ្នកនាំពាក្យក្រុមហ៊ុន NABEP បានប្រាប់ Reuters ថា ក្រុមហ៊ុនកំពុងដើរលើគន្លងផ្លូវត្រូវ។ លោកបានមានប្រសាសន៍ថា៖ “យើងកំពុងស្ថិតនៅជួរមុខ នៃការស្តារឡើងវិញនូវឧស្សាហកម្មប្រេងរបស់វ៉េណេស៊ុយអេឡា”។
ក្រុមអ្នកជំនាញក្នុងឧស្សាហកម្មនេះបានលើកឡើងថា ក្រុមហ៊ុន NABEP កំពុងប្រឈមមុខនឹងបញ្ហាដ៏ធំជាច្រើន។ ក្រុមហ៊ុនត្រូវតែធានាឱ្យបាននូវប្រភពទុន ត្រូវប្រកួតប្រជែងដណ្តើមយកគ្រឿងចក្រខួង (Rigs) ឧបករណ៍ និងរោងចក្រថាមពល ត្រូវអនុវត្តការជួសជុលហេដ្ឋារចនាសម្ព័ន្ធដែលទ្រុឌទ្រោមជាច្រើន ក៏ដូចជាត្រូវបង្កើនកម្លាំងពលកម្មឱ្យបានឆាប់រហ័សនៅក្នុងប្រទេសមួយ ដែលជួបប្រទះនឹងការធ្វើចំណាកស្រុកនៃបុគ្គលិកជំនាញអស់ជាច្រើនទសវត្សរ៍មកហើយ។
អតីតរដ្ឋមន្ត្រីថាមពលវ៉េណេស៊ុយអេឡា លោក Humberto Calderon Berti បានប្រាប់អង្គសន្និសីទមួយកាលពីខែកញ្ញាថា លោកមានជំនឿជាក់ថា “កិច្ចព្រមព្រៀងនេះនឹងមិនស្ថិតស្ថេរយូរឡើយ” ដោយលោកបានយោងទៅលើការខ្វះខាតលក្ខណៈសម្បត្តិបច្ចេកទេស និងបទពិសោធន៍ប្រតិបត្តិការដ៏ខ្លីរបស់ក្រុមហ៊ុននេះ។
ប្រែសម្រួល៖ គីរី
