ភ្នំពេញ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ថ្ងៃអង្គារ ទី០៨ ខែកញ្ញា ឆ្នាំ២០២០ បាន ដឹកនាំគណៈប្រតិភូក្រសួងអញ្ជើញចុះជួបសំណេះសំណាលសួរសុខទុក្ខនាយទាហាន នាយទាហានរង កងរាជអាវុធហត្ថ នៅបញ្ជាការដ្ឋានកងរាជអាវុធហត្ថលើផ្ទៃប្រទេស ឋិតក្នុងសង្កាត់បឹងកក់១ ខណ្ឌទួល គោក រាជធានីភ្នំពេញ ក្នុងឱកាសអបអរសាទរពិធីបុណ្យភ្ជុំបិណ្ឌប្រពៃណីជាតិខ្មែរ ឆ្នាំជូត ទោស័ក ពុទ្ធ សករាជ ២៥៦៤ គ្រឹស្តសករាជ ២០២០។
កម្មវិធីនេះមានការអញ្ជើញចូលរួមពី លោកនាយឧត្តមសេនីយ៍ សៅ សុខា អគ្គមេបញ្ជាការរងនៃ កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ឯកឧត្ដម លោកជំទាវ ព្រមទាំងនាយទាហាន នាយទាហានរង នៃកងរាជអាវុធហត្ថលើផ្ទៃប្រទេសផងដែរ។
លោក ទេសរដ្ឋមន្ត្រីបានគូសបញ្ជាក់អំពីសារសំខាន់នៃសុខសន្តិភាព និងស្ថិរភាពនយោបាយដ៏រឹងមាំ ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កម្ពុជារក្សាបានកំណើនសេដ្ឋកិច្ចប្រចាំឆ្នាំក្នុង រង្វង់ ៧% ធ្វើឱ្យមានការរីកចម្រើនលើគ្រប់វិស័យ។
លោកទេសរដ្ឋមន្ត្រីបានឱ្យដឹងផងដែរថា៖ ក្រសួងបានរិះរកគ្រប់មធ្យោបាយ និងយន្តការនានាដើម្បី ផ្ដល់សេវាសាធារណៈចាំបាច់ជូនប្រជាពលរដ្ឋឱ្យបានលឿន មានប្រសិទ្ធភាព និងតម្លាភាពតាមរយៈការ អភិវឌ្ឍកម្មវិធីព័ត៌មានវិទ្យា និងសហការជាមួយក្រសួងស្ថាប័នពាក់ព័ន្ធ ក្នុងការតភ្ជាប់ប្រព័ន្ធរវាងគ្នា បង្កលក្ខណៈងាយស្រួលដល់ការផ្ដល់សេវាសាធារណៈ រួមមាន៖ ឆៀកចល័ត មណ្ឌលប្ដូរនិងពន្យារបណ្ណ បើកបរនៅផ្សារទំនើបអ៊ីអនម៉ល១ អ៊ីអនម៉ល២ និងផ្សារទំនើបជីបម៉ុង ជាដើម ព្រមទាំងបានបំពាក់កាមេរ៉ា ឆ្លាតវៃ និងប្រព័ន្ធព័ត៌មានវិទ្យាទំនើបដើម្បីចាប់រថយន្តដឹកទំនិញលើសទម្ងន់កម្រិតកំណត់ផងដែរ។
លើសពីនេះទៅទៀត លោក បានគូសបញ្ជាក់អំពីភាពចាំបាច់នៃការធ្វើទំនើបកម្មហេដ្ឋា រចនាសម្ព័ន្ធផ្លូវថ្នល់ ផ្លូវទឹក ផ្លូវដែក និងស្ពានឱ្យបានលឿនបំផុត ដើម្បីដោះស្រាយ កំណើនយានយន្តយ៉ាង លឿនពីមួយឆ្នាំទៅមួយឆ្នាំ ដោយសារកម្ពុជាមានសុខសន្តិភាព និងស្ថិរភាពនយោបាយ ភូមិសាស្ត្រ អំណោយផល មានសម្បត្តិវប្បធម៌អរិយធម៌អច្ឆរិយៈដែលអាចទាក់ទាញភ្ញៀវទេសចរ និងវិនិយោគិនជាតិ អន្តរជាតិច្រើនលើសពីការរំពឹងទុក និងចំណូលប្រជាពលរដ្ឋកើនឡើង មានទីផ្សារលក់ផលិតផល ជាពិសេស កម្ពុជាជា ប្រទេសងាយស្រួល ក្នុងការធ្វើជំនួញក្នុងតំបន់ក្រោមផែនការមេតភ្ជាប់អាស៊ាន។
ជាមួយគ្នានេះផងដែរ លោកទេសរដ្ឋមន្ត្រីបានធ្វើបច្ចុប្បន្នភាពអំពី គម្រោងបំពាក់ប្រព័ន្ធជញ្ជីងឆ្លាតវៃ បង្កប់នៅក្រោមដីដើម្បីទប់ស្កាត់ការដឹកជញ្ជូន ទំនិញលើសទម្ងន់កម្រិតកំណត់ ការសិក្សាគម្រោងអភិវឌ្ឍ កំពង់ផែទឹកជ្រៅនៅខេត្តព្រះសីហនុ កិច្ចព្រមព្រៀងក្របខណ្ឌ នៃការសាងសង់ផ្លូវល្បឿនលឿនភ្នំពេញ-បាវិត ការសិក្សាគម្រោង ផ្លូវក្រវាត់ក្រុងទី៤ គម្រោងលើកកម្ពស់កម្រិតគុណភាព ផ្លូវទាំង៣៨ខ្សែក្នុងខេត្ត សៀមរាបដែលទទួលបានការអនុម័ត ពីរាជរដ្ឋាភិបាលនាពេលថ្មីៗនេះ គម្រោងសាងសង់ ផ្លូវរថភ្លើងក្រោម ដីនៅរាជធានីភ្នំពេញ ដើម្បីកាត់បន្ថយការកកស្ទះ និងគ្រោះថ្នាក់ចរាចរណ៍ គម្រោងដាក់ឱ្យដំណើរ ការប្រព័ន្ធស្វ័យប្រវត្តិកម្មផ្ទេរកម្មសិទ្ធិយានជំនិះ រួមជាមួយនឹងការ បង់ពន្ធប្រថាប់ត្រា នៅទីតាំងតែមួយ សំដៅកាត់បន្ថយភាពស្មុគស្មាញ ដល់ប្រជាពលរដ្ឋ និងគម្រោងផ្សេងៗជាច្រើនទៀត។
លោកទេសរដ្ឋមន្ត្រី បាននាំយកសម្ភារបរិក្ខារចាំបាច់ និងគ្រឿងឧបភោគបរិភោគ រួមមាន៖ ទឹកស៊ីអ៊ីវ ចំនួន២០០យួរ ទឹកត្រីចំនួន២០០យួរ ទឹកសុទ្ធកម្ពុជាចំនួន៥០០កេស មីជាតិចំនួន ៥០០កេស ត្រីខចំនួន ៥០កេស អង្ករចំនួន៥តោន និងថវិកាមួយចំនួនចែក ជូនដល់បងប្អូនជានាយទាហាន និងនាយទាហានរង ព្រមទាំងបានបួងសួង ដល់បារមីវត្ថុស័ក្ដិសិទ្ធក្នុងលោក តាមជួយបីបាច់ ថែរក្សាឱ្យជួបតែសេចក្តីសុខ ចម្រើន ដើម្បីចូលរួមអនុវត្តគោលនយោបាយ របស់រាជរដ្ឋាភិបាលឱ្យ កាន់តែមានការអភិវឌ្ឍថែមទៀត។
លោកទេសរដ្ឋមន្ត្រី បានសម្ដែងនូវ ការកោតសរសើរ និងថ្លែងអំណរគុណយ៉ាងជ្រាលជ្រៅ ដល់នាយ ទាហាន នាយទាហានរង និងពលទាហានទាំងអស់ ដែលបានលះបង់ គ្រប់បែបយ៉ាង ដើម្បីការពារបូរណ ភាពទឹកដី ការពាររដ្ឋធម្មនុញ្ញ ការពារព្រះមហាក្សត្រ ការពារប្រមុខរាជរដ្ឋាភិបាល ស្របច្បាប់ ដែលកើត ចេញពីការបោះឆ្នោត របស់ប្រជាពលរដ្ឋ និងបានបង្កលក្ខណៈងាយស្រួល ដល់រាជរដ្ឋាភិបាល ក្នុងការ អភិវឌ្ឍ ដើម្បីប្រែក្លាយទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងប្រទេសចំណូលខ្ពស់នៅឆ្នាំ២០៥០។
ដោយឡែក ក្នុងសន្ទរកថាថ្លែងទៅកាន់ អង្គពិធីទាំងមូលនាឱកាសនោះ លោកនាយឧត្តមសេនីយ៍ បាន ជម្រាបជូនអំពីប្រវត្តិ និងរចនាសម្ព័ន្ធដឹកនាំ របស់កងរាជអាវុធហត្ថលើផ្ទៃប្រទេស ជាពិសេសភារកិច្ច របស់កងរាជអាវុធហត្ថក្នុងការជួយជ្រោមជ្រែង ដល់រដ្ឋបាលអាជ្ញាធរដែនដី ជួយដល់កម្លាំង អនុវត្តច្បាប់ កម្លាំងនគរបាលជាតិ ជួយដល់ការអនុវត្ត របស់តុលាការក្នុងតួនាទី ជានគរបាលយុត្តិធម៌ ជាងនេះទៀត រួមចំណែកដល់ការ ការពារសន្តិសុខ សណ្ដាប់ធ្នាប់ និង ការបង្ក្រាបបទល្មើសជាដើម៕
