បរទេស៖ កងកម្លាំងចម្រុះ ដឹកនាំដោយអារ៉ាប៊ីសាអូឌីត នៅប្រទេសយេម៉ែន នៅថ្ងៃអង្គារនេះ បានកម្ទេចទូកផ្ទុកគ្រាប់ផ្ទុះពីរគ្រឿង ដែលដំណើរការ និងបញ្ជាពីចម្ងាយ ដោយក្រុមហូធី ជាសម្ព័ន្ធមិត្តអ៊ីរ៉ង់ ចេញពីខេត្ត Hodeidah នេះបើតាមសេចក្តីរាយការណ៍មួយ របស់ទីភ្នាក់ងារសារព័ត៌មាន SPA។
តាមសេចក្តីរាយការណ៍ ទីភ្នាក់ងារសារព័ត៌មាន SPA បានដកស្រង់សម្តីមន្ត្រីនាំពាក្យ របស់កងកម្លំាងចម្រុះមួយរូបថា ទូកទាំងពីរគ្រឿងនោះ បានបង្កការគម្រាមកំហែង ដល់នាវាចរណ៍ នៅច្រកសមុទ្រ Bab al-Mandab ដែលភ្ជាប់គ្នា រវាងមហាសមុទ្រឥណ្ឌា និងសមុទ្រក្រហម។
គួរបញ្ជាក់ថា នៅក្នុងខែនេះ កងកម្លាំងចម្រុះអារ៉ាប់ ដឹកនាំដោយអារ៉ាប៊ីសាអូឌីត បានវាយប្រហារគោលដៅយោធា គ្រប់គ្រងដោយពួកហូធី នៅកំពង់ផែ Salif ស្ថិតក្នុងខេត្ត Hudaydah ប្រទេសយេម៉ែនភាគនិរតី ហើយកងកម្លាំងចម្រុះនេះ ក៏បានប្រកាសផងដែរ អំពីការកម្ទេចទីតាំងពួកហូធី ដែលតាមសេចក្តីរាយការណ៍ ត្រូវបានប្រើប្រាស់ សម្រាប់ផលិតទូក និងកូនដ្រូនផ្ទុកគ្រាប់ផ្ទុះ៕ ប្រែសម្រួល៖ប៉ាង កុង
