វ៉ាស៊ីនតោន៖ កាសែតរបស់ អាមេរិក The New York Times បានផ្សាយកាលពី ថ្ងៃពុធទី ១៨ ខែមីនា ឆ្នាំ២០២០ថា លោក ត្រាំ ប្រធានាធិបតីសហរដ្ឋអាមេរិក បានការពារនូវអ្វី ដែលជាការអនុវត្តន៍របស់គាត់ ដោយបានហៅវីរុសកូរ៉ូណា ថា ជា “វីរុសចិន” ការថ្លែងដូច្នេះ ដោយគាត់មិនបានគិតអំពីការរើសអើង នូវជាតិសាសន៍ ឬការប្រឆាំង ណាមួយពីសំណាក់ប្រទេសចិន ឡើយ ។
តាមរយៈការពន្យល់ឲ្យដឹងអំពី ហេតុផលរបស់គាត់ លោក ត្រាំ បានថ្លែងថា “វាមិនបានប្រកាន់អំពីពូជសាសន៍អ្វីនោះទេ” ។ ដោយសារវីរុសនេះ មកពីប្រទេសចិន មែន ។
ក៏ប៉ុន្តែពាក្យនេះបានធ្វើឱ្យ មន្រ្តីចិន ខឹងសម្បារ និងក្រុមអ្នករិះគន់យ៉ាងខ្លាំង ហើយអ្នកជំនាញចិន បាននិយាយថា ការដាក់ស្លាកវីរុសដោយ វិធីនេះនឹងធ្វើឱ្យមានភាពតានតឹង រវាងប្រទេសទាំងពីរកាន់តែខ្លាំងឡើងៗ ស្របពេល ដែលលទ្ធផល នៃការស្អប់ខ្ពើមដល់មេដឹកនាំ អាមេរិក ក៏កើតមានដែរ ។
ជនជាតិអាមេរិកដើម កំណើតអាស៊ីបានរាយការណ៍ អំពីឧប្បត្តិហេតុនៃ ការនិយាយបង្កាច់បង្ខូចពូជសាសន៍និងការរំលោភបំពាន លើរាងកាយ ដោយសារតែការយល់ ច្រឡំថា ប្រទេសចិន គឺជាបុព្វហេតុនៃវីរុសនេះ ។
ការប្រើប្រាស់ពាក្យនេះ មិនត្រឹមតែធ្វើឲ្យមនុស្ស ទំាងអស់នៅទូទាំងពិភពលោក មានការចាប់អារម្មណ៍ប៉ុណ្ណោះទេ ថែមទាំងនៅទីនេះ (សំដៅលើប្រទេសចិន)ផងដែរ វាក៏កំពុងតែបង្កើតជានិទានកថាមួយនៅក្នុងប្រទេសចិន អំពីការស្អប់ខ្ពើមនិងការខ្លាចរបស់អាមេរិក ដែលមិនត្រឹមតែចំពោះបក្សកុម្មុយនិស្តចិនប៉ុណ្ណោះទេ រួមទាំងចំពោះប្រទេសចិន និងជនជាតិចិនទំាងអស់ផងដែរ ។ លោក Scott Kennedy អ្នកជំនាញជនជាតិចិន នៅមជ្ឈមណ្ឌលសិក្សាយុទ្ធសាស្ត្រនិងអន្តរជាតិ បានលើកឡើងដូច្នេះ ៕ ប្រែសម្រួលដោយ៖ ម៉ៅ បុប្ផាមករា
