ព័ត៌មានអន្តរជាតិ

ទីភ្នាក់ងារឧតុនិយមជប៉ុន ព្រមានពីហានិភ័យទឹកជំនន់ និងការរអិលបាក់ដីបន្ថែម បន្ទាប់ពីគ្រោះធម្មជាតិនេះ សម្លាប់មនុស្សយ៉ាងតិច ៦០ នាក់

តូក្យូ៖ ទីភ្នាក់ងារឧតុនិយមជប៉ុន បានព្រមាននៅថ្ងៃព្រហស្បតិ៍ ពីហានិភ័យនៃទឹកជំនន់ និងការរអិលបាក់ដីបន្ថែមទៀត ខណៈដែលភ្លៀងធ្លាក់ខ្លាំង ដែលមិនធ្លាប់មាន ចាប់តាំងពីចុងសប្តាហ៍មុន នៅភាគនិរតី និងភាគកណ្តាលប្រទេសជប៉ុន នឹងបន្តគ្មានស្ថេរភាព បន្ទាប់ពីគ្រោះធម្មជាតិនេះ បានសម្លាប់មនុស្សយ៉ាងតិច ៦០ នាក់នៅតំបន់ Kyushu ។

យោងតាមសារព័ត៌មាន Kyodo News ចេញផ្សាយនៅថ្ងៃទី០៩ ខែកក្កដា ឆ្នាំ២០២០ បានឱ្យដឹង ដោយយោងតាមទីភ្នាក់ងារនេះថា ព្យុះភ្លៀងរដូវវស្សា ដែលលាតសន្ធឹងពីតំបន់ Kyushu រហូតដល់តំបន់ Kanto ត្រូវបានគេរំពឹងថា នឹងនៅតែមានលទ្ធភាព អំពីការធ្លាក់ភ្លៀងខ្លាំង នៅភាគខាងលិចនិងភាគខាងកើត ប្រទេសជប៉ុន រហូតដល់យ៉ាងហោចណាស់ថ្ងៃអាទិត្យ។

ជំនន់ទឹកភ្លៀងរហូតដល់ ២៥០ មីល្លីម៉ែត្រត្រូវបានគេរំពឹងថា នឹងកើតឡើងនៅតំបន់ Kyushu និង Shikoku ក្នុងរយៈពេល ២៤ ម៉ោងដល់ម៉ោង ៦ ព្រឹកថ្ងៃសុក្រ, ១៨០ មីលីម៉ែត្រនៅតំបន់ Kinki និង ១៥០ មីលីម៉ែត្រនៅតំបន់ Kanto-Koshin និង Tokai ។

ជំនន់ទឹកភ្លៀង បានបណ្តាលឱ្យមនុស្ស ៦០ នាក់បានស្លាប់នៅក្នុងតំបន់ Kyushu ជាមួយនឹងមនុស្សម្នាក់ទៀត ត្រូវបានគេបារម្ភថាស្លាប់ ហើយយ៉ាងហោចណាស់មនុស្ស ១៣ នាក់បានបាត់ខ្លួន។

ទីភ្នាក់ងារឧតុនិយមជប៉ុន ក៏បានស្នើសុំឱ្យសាធារណជន មានការប្រុងប្រយ័ត្នខ្ពស់ ព្រោះភ្លៀងបានធ្វើឱ្យដីបាក់ និងបណ្តាលឱ្យមានទន្លេចំនួន ៥៩ រួមទាំងភូមិគូម៉ា ក្នុងខេត្ត Kumamoto ហូរហៀរ ខណៈដែលការរអិលបាក់ដី យ៉ាងហោចណាស់ ១២៣ បានកើតឡើងនៅក្នុងខេត្តចំនួន ១៨ គិតត្រឹមថ្ងៃពុធ៕
ប្រែសម្រួលៈ ណៃ តុលា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top