គៀវ៖ រដ្ឋមន្រ្តីការបរទេសអ៊ុយក្រែន លោក Dmytro Kuleba បានឲ្យដឹងនៅលើបណ្តាញសង្គមហ្វេសប៊ុកថា ប្រទេសអ៊ុយក្រែនបានចាប់ផ្តើមចរចា ជាមួយគណៈប្រតិភូអ៊ីរ៉ង់មួយ ស្តីពីសំណងសម្រាប់យន្តហោះរបស់ក្រុមហ៊ុនអាកាសចរណ៍ អន្តរជាតិអ៊ុយក្រែន (UIA) ដែលត្រូវបានបាញ់ទម្លាក់នៅក្បែរ ទីក្រុងតេអេរ៉ង់ កាលពីដើមឆ្នាំនេះ។
អ្នកការទូតរូបនេះបានលើកឡើងថា “ថ្ងៃនេះនៅក្នុង ទីក្រុងគៀវ គណៈប្រតិភូអ៊ីរ៉ង់ បានចាប់ផ្តើមការចរចា ស្តីពីសំណងសម្រាប់ការបាញ់ទម្លាក់ យន្តហោះអ៊ែរឡាញអន្ដរជាតិ PS752 របស់អ៊ីរ៉ង់។ យើងបានខិតខំអស់រយៈពេល ជាយូរមកហើយ ដើម្បីចាប់ផ្តើមដំណើរការចរចា ហើយខ្ញុំស្វាគមន៍ការចាប់ផ្តើមនៃការចរចានេះ” ។
លោកបានកត់សម្គាល់ថា ដំណើរការនេះ នឹងមិនងាយស្រួលនោះទេ ប៉ុន្តែអ៊ុយក្រែននឹងធ្វើអ្វីៗគ្រប់យ៉ាង ដើម្បីទទួលបានសំណងអតិបរិមា សម្រាប់សាច់ញាតិរបស់ជនរងគ្រោះដោយសារការធ្លាក់យន្តហោះខាងលើនេះ។
យន្តហោះប៊ូអ៊ីង – ៧៣៧ ដែលធ្វើដំណើរពីតេហេរ៉ង់ ទៅគៀវ ត្រូវបានបាញ់ទម្លាក់ដោយរ៉ុក្កែត ២ គ្រាប់ភ្លាមៗបន្ទាប់ពីហោះចេញពីអាកាសយានដ្ឋាន អន្តរជាតិ Khomeini របស់ទីក្រុងតេអេរ៉ង់ នៅថ្ងៃទី០៨ ខែមករា។
គួរបញ្ជាក់ថា នៅលើយន្ដហោះមានអ្នកដំនើរ ដូចជាពលរដ្ឋអ៊ុយក្រែន អ៊ីរ៉ង់ កាណាដា ស៊ុយអែត អាហ្វហ្គានីស្ថាន និងចក្រភពអង់គ្លេស៕ដោយ ឈូក បូរ៉ា
