ព័ត៌មានអន្តរជាតិ

តួកគីនឹងធ្វើការស្ទង់មើលការរញ្ជួយដី នៅសមុទ្រមេឌីទែរ៉ានេ ភាគខាងកើត

បរទេស៖កងទ័ពជើងទឹករបស់ប្រទេសតួកគី នៅពេលថ្មីៗនេះ បានចេញសេចក្តីណែនាំមួយ ដោយនិយាយថា នាវតួកគី Oruc Reis នឹងធ្វើការស្ទង់មើលការរញ្ជួយដី នៅសមុទ្រមេឌីទែរ៉ានេភាគខាងកើត ក្នុងពេល១០ថ្ងៃក្រោយទៀត ហើយនេះគឺជាវិធានការមួយ ដែលទំនងជាបង្កឲ្យមានភាពតានតឹងកាន់តែខ្លាំងជាមួយប្រទេសក្រិក។ 

សេចក្តីជូនដំណឹងផ្នែកដែនសមុទ្រ តាមសេចក្តីរាយការណ៍ បាននិយាយថា នាវាពីរគ្រឿងផ្សេងទៀត គឺនាវា Ataman និងនាវា Cengiz Han រួមជាមួយនាវារុករក Oruc Reis នឹងបន្តការងារនៅក្នុងតំបន់ ដែលរួមបញ្ចូលទាំងតំបន់នៅភាគខាងត្បូងកោះក្រិកឈ្មោះ Kastellorizo រហូតដល់ថ្ងៃទី២២ ខែតុលា។ 

គួរបញ្ជាក់ថា ប្រទេសតួកគីនិងប្រទេសក្រិក មានការខ្វែងគំនិតគ្នាជុំវិញការអះអាងកម្មសិទ្ធិត្រួតស៊ីគ្នា សម្រាប់ធនធានអ៊ីដ្រូកាបូននៅក្នុងតំបន់។ រដ្ឋមន្ត្រីការបរទេសក្រិកនិងតួកគី តាមសេចក្តីរាយការណ៍ កាលពីសប្ដាហ៍មុននេះ បានជួបគ្នា និងបានព្រមព្រៀងគ្នាប្រារព្ធធ្វើកិច្ចពិភាក្សាទ្វេភាគី ស្តីពីជម្លោះនានា៕ប្រែសម្រួល៖ប៉ាង កុង 

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top