បរទេស៖អ្នកវិទ្យាសាស្ត្រនុយក្លេអ៊ែរបស់ប្រទេសអ៊ីរ៉ង់ លោក Mohsen Fakhrizadeh ត្រូវបានគេធ្វើឃាតនៅជិតទីក្រុងតេអេរ៉ង់ កាលពីថ្ងៃសុក្រម្សិលមិញនេះ នេះបើយោងតាមសេចក្តីរាយការណ៍មួយ ចេញផ្សាយដោយទីភ្នាក់ងារសារព័ត៌មាន UPI នៅថ្ងៃទី២៨ ខែវិច្ឆិកា ឆ្នាំ២០២០។
ចំណែកទីភ្នាក់ងារសារព័ត៌មាន Tasmin News Agency បាននិយាយថា លោក Mohsen Fakhrizadeh បានស្លាប់បាត់បង់ជីវិត ក្រោយពីក្រុមវាយប្រហារប្រដាប់ដោយអាវុធ បានប៉ះទង្គិចគ្នាជាមួយអង្គរក្សរបស់លោក នៅក្នុងស្រុក Absard ជិតទីក្រុង Damavand ចម្ងាយ៣៧ម៉ាយខាងកើតទីក្រុងតេអេរ៉ង់។
រដ្ឋមន្ត្រីការបរទេសអ៊ីរ៉ង់ បាននិយាយក្នុងសារបង្ហោះលើបណ្ដាញសង្គមធ្វីតធ័រដូច្នេះថា “នៅថ្ងៃនេះ ពួកភេរវករ បានសម្លាប់អ្នកវិទ្យាសាស្ត្រអ៊ីរ៉ង់ដ៏លេចធ្លោរមួយរូប។ ភាពកំសាកជាមួយការបង្ហាញពីតួនាទីដ៏ច្បាស់របស់អ៊ីស្រាអែលនេះ បង្ហាញឲ្យឃើញនូវភាពក្តៅក្រហាយប្រកបដោយភាពអស់សង្ឃឹមរបស់ជនល្មើស។ អ៊ីរ៉ង់អំពាវនាវដល់សហគមន៍អន្តរជាតិ ហើយជាពិសេសនោះ គឺសហភាពអឺរ៉ុប ឲ្យបញ្ចប់ស្តង់ដារដ៍ដ៏គួរឲ្យអាម៉ាស់ទ្វេឡើងរបស់ពួកគេ និងថ្កោលទោសចំពោះទង្វើភេរវកម្មនេះ”៕
ប្រែសម្រួល៖ប៉ាង កុង
