ព័ត៌មានអន្តរជាតិ

កងទ័ពជើងទឹក អាមេរិក និងកងទ័ពអាកាស ម៉ាឡេស៊ីធ្វើសមយុទ្ធ ទ្វេភាគីនៅសមុទ្រចិន ខាងត្បូង

បរទេស៖ កងទ័ពជើងទឹកសហរដ្ឋអាមេរិក តាមសេចក្តីរាយការណ៍ បាននិយាយនៅថ្ងៃពុធសប្ដាហ៍នេះថា ក្រុមវាយប្រហាររបស់នាវាផ្ទុកយន្តហោះអាមេរិក USS Theodore Roosevelt ទើបបានបញ្ចប់សមយុទ្ធយោធាមួយ នៅដែនសមុទ្រចិនខាងត្បូង ជាមួយកងកម្លាំងជើងអាកាសនៃប្រទេសម៉ាឡេស៊ី។ 

នាវាផ្ទុកយន្តហោះនិងកងនាវាលេខ១១ ដែលអមដំណើរដោយនាវាចម្បាំងសមត្ថភាពមីស៊ីល USS Bunker Hill ព្រមទាំងនាវាពិឃាត USS John Finn និង USS Russell បានធ្វើសមយុទ្ធយោធាទ្វេភាគី ជាមួយកងទ័ពអាកាសម៉ាឡេស៊ី នៅថ្ងៃអង្គារនិងថ្ងៃពុធសប្ដាហ៍នេះ។ 

នៅក្នុងសេចក្តីប្រកាសព័ត៌មាន លោកឧត្តមនាវី Doug Verissimo ជាមេបញ្ជាការនៃក្រុមវាយប្រហាររបស់នាវាផ្ទុកយន្តហោះលេខ៩ បានមានប្រសាសន៍យ៉ាងដូច្នេះថា “យើងថ្លែងអំណរគុណយ៉ាងជ្រាល់ជ្រៅ សម្រាប់ឱកាសធ្វើការហ្វឹកហាត់រួមគ្នាជាមួយកងទ័ពអាកាសម៉ាឡេស៊ី”។ 

គួរបញ្ជាក់ថា សម្ពន្ធមិត្តយោធារបស់សហរដ្ឋអាមេរិក ជាមួយអូស្ត្រាលី និងនូវែលសេឡង់ ធ្វើប្រទេសម៉ាឡេស៊ីឲ្យជាសមាជិកមួយនៃសន្ធិសញ្ញារៀបចំការពារអំណាចទាំង៥ ជាមួយអូស្ត្រាលី នូវែលសេឡង់ សិង្ហបុរី និងអង់គ្លេស ដែលជាសម្ពន្ធមិត្តរបស់សហរដ្ឋអាមេរិក។ ប្រទេសម៉ាឡេស៊ី ក៏មានជាប់ពាក់ព័ន្ធក្នុងជម្លោះទឹកដីជាមយប្រទេសចិនផងដែរ៕ 

ប្រែសម្រួល៖ប៉ាង កុង 

To Top