ព័ត៌មានអន្តរជាតិ

តួកគី គ្រោងទិញ ប្រព័ន្ធការពារ S-400 បន្ថែមពីរុស្ស៊ី

បរទេស ៖ ប្រធានាធិបតី នៃប្រទេសតួកគី លោក Tayyip Erdogan បាននិយាយថា តួកគីនៅតែមានបំណង ទិញប្រព័ន្ធការពារមីស៊ីល S-400 ក្រុមទី២ ពីប្រទេសរុស្ស៊ី ហើយនេះជាទង្វើមួយដែលអាចនឹងបង្កឲ្យមានជម្លោះកាន់តែខ្លាំង ជាមួយទីក្រុងវ៉ាស៊ីនតោន និង បង្កឲ្យមានទណ្ឌកម្មអាមេរិកថ្មី ។

ទីក្រុងវ៉ាស៊ីនតោននិយាយថា ប្រព័ន្ធការពារ S-400 បង្កឲ្យមានការគម្រាមកំហែង ដល់យន្តហោះចម្បាំង F-35 និងប្រព័ន្ធការពារ របស់អង្គការណាតូ ចំណែកតួកគីនិយាយថា ខ្លួនមិនអាចទិញប្រព័ន្ធការពារ ដែនអាកាស ពីសម្ពន្ធមិត្តណាតូណាមួយ តាមលក្ខខណ្ឌ ដែលពេញចិត្តនោះទេ ។

នៅក្នុងបទសម្ភាសន៍មួយ ជាមួយទីភ្នាក់ងារសារព័ត៌មាន CBS News កាលពីថ្ងៃអាទិត្យ លោក Erdogan បានមានប្រសាសន៍ថា “នៅក្នុងពេលអនាគត គ្មានអ្នកណាម្នាក់ នឹងអាចចូលមកជ្រៀតជ្រែក ក្នុងប្រព័ន្ធការពារជាតិ ប្រភេទអ្វីដែលយើងទិញ ពីប្រទេសណា នៅក្នុងកម្រិតណានោះទេ” ។

គួរបញ្ជាក់ថា សហរដ្ឋអាមេរិក បានដាក់ទណ្ឌកម្មលើនាយកដ្ឋាន ឧស្សាហកម្មការពារជាតិ របស់ប្រទេសតួកគី ប្រធានរបស់នាយកដ្ឋាន លោក Ismail Demir និងបុគ្គលិក៣រូបផ្សេងទៀត កាលពីខែធ្នូ បន្ទាប់ពីតួកគីទិញយកប្រព័ន្ធការពារជាតិ S-400 ក្រុមដំបូង ពីប្រទេសរុស្ស៊ី ៕ ប្រែសម្រួល៖ប៉ាង កុង

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top