ព័ត៌មានអន្តរជាតិ

អ៊ីរ៉ង់ បង់ប្រាក់សេវាកម្មឲ្យ អង្គការសហប្រជាជាតិ ដើម្បីស្ដារសិទ្ធិបោះឆ្នោត របស់ខ្លួនឡើងវិញ

តេអេរ៉ង់៖ ក្រសួងហិរញ្ញវត្ថុរបស់ទីក្រុងសេអ៊ូល បានឲ្យដឹងថា ប្រទេសអ៊ីរ៉ង់ បានបង់ថ្លៃសេវារបស់ខ្លួនទៅឱ្យ អង្គការសហប្រជាជាតិ ជាមួយនឹងមូលនិធិរបស់ប្រទេស ដែលបានជាប់គាំងនៅ ក្នុងប្រទេសកូរ៉េខាងត្បូង នៅក្នុងការផ្លាស់ប្តូរមួយ ដើម្បីស្ដារឡើងវិញនូវ អំណាចបោះឆ្នោតរបស់ខ្លួនជាបន្ទាន់។

អ៊ីរ៉ង់ បានធ្វើសំណើបន្ទាន់មួយ ទៅកាន់កូរ៉េខាងត្បូង កាលពីថ្ងៃទី១៣ ខែមករា សម្រាប់ការប្រើប្រាស់ មូលនិធិរបស់ទីក្រុងតេអេរ៉ង់ ក្នុងទីក្រុងសេអ៊ូល ដើម្បីបង់ថ្លៃសេវារបស់ខ្លួន បន្ទាប់ពីត្រូវបានជូនដំណឹង ដោយអង្គការសហប្រជាជាតិថា ខ្លួននឹងបាត់បង់សិទ្ធិបោះឆ្នោតភ្លាមៗ សម្រាប់ការជាប់បំណុល។

អ៊ីរ៉ង់មានមូលនិធិជាង ៧ពាន់លានដុល្លារអាមេរិក សម្រាប់ការដឹកជញ្ជូនប្រេង ដែលជាប់គាំងនៅធនាគារ កូរ៉េខាងត្បូងចំនួនពីរគឺ ធនាគារឧស្សាហកម្មកូរ៉េ និងធនាគារ Woori ដោយសារតែការដាក់ទណ្ឌកម្ម របស់សហរដ្ឋអាមេរិក។

សហរដ្ឋអាមេរិក បានដាក់ទណ្ឌកម្មឡើងវិញ លើអ៊ីរ៉ង់ក្នុងឆ្នាំ២០១៨ នៅពេលដែលពេលនោះ អតីតប្រធានាធិបតីអាមេរិកលោក ដូណាល់ ត្រាំ បានដកខ្លួនចេញពីកិច្ចព្រមព្រៀង នុយក្លេអ៊ែរដ៏សំខាន់ឆ្នាំ២០១៥ ជាមួយប្រទេសអ៊ីរ៉ង់ និងប្រទេសមហាអំណាចចំនួន៥ ផ្សេងទៀត។

ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា ទឹកប្រាក់ចំនួន ១៨លានដុល្លារ ដែលជាផ្នែកនៃថ្លៃសេវាខូច ត្រូវបានបង់ទៅឱ្យអង្គការសហប្រជាជាតិ កាលពីថ្ងៃសុក្រ ដោយប្រើទ្រព្យសកម្មទីក្រុងតេអេរ៉ង់ ដែលបានបង្កកក្នុង ប្រទេសកូរ៉េខាងត្បូង បន្ទាប់ពីមានការពិគ្រោះយោបល់ ជាមួយអង្គការពាក់ព័ន្ធ រួមទាំងការិយាល័យគ្រប់គ្រង ទ្រព្យសម្បត្តិបរទេសរបស់សហរដ្ឋអាមេរិក និងលេខាធិការដ្ឋាន អង្គការសហប្រជាជាតិ។

ក្រសួងបានឲ្យដឹងនៅក្នុង សេចក្តីថ្លែងការណ៍មួយថា “សិទ្ធិបោះឆ្នោតរបស់អ៊ីរ៉ង់ នៅមហាសន្និបាត ត្រូវបានគេរំពឹងថា នឹងត្រូវបានស្តារឡើងវិញភ្លាមៗ ជាមួយនឹងការទូទាត់សាច់ប្រាក់រួចរាល់” ៕

ដោយ ឈូក បូរ៉ា

To Top