បរទេស ៖ រដ្ឋមន្ត្រីក្រសួងវប្បធម៌ និងព័ត៌មាន របស់ប្រទេសអ៊ុយក្រែន បានប្រកាសថា ប្រទេសលោកខាងលិច នឹងធ្វើបានល្អជាង សម្រាប់ការបញ្ជូនសព្វាវុធ គ្រាប់រំសេវ និង សាច់ប្រាក់ មកឱ្យរដ្ឋាភិបាលទីក្រុងគៀវ ដើម្បីជួយការពារប្រឆាំង នឹងការឈ្លានពាន របស់រុស្ស៊ី ជាជាងការឃោសនាអំពីការបង្កហានិភ័យ នៃសង្គ្រាមដែលនឹងកើតឡើង។
យោងតាមសារព័ត៌មាន RT ចេញផ្សាយកាល ពីថ្ងៃទី១ ខែកុម្ភៈ ឆ្នាំ២០២២ បានឱ្យដឹងថា ថ្លែងក្នុងអំឡុងពេលបង្ហាញ ខ្លួននៅលើកញ្ចក់ ទូរទស្សន៍អ៊ុយក្រែនប៉ុស្ត 1+1 កាលពីថ្ងៃចន្ទ លោក Alexander Tkachenko បានថ្លឹងថ្លែងលើជំហាន ដែលប្រទេសមួយចំនួន កំពុងធ្វើដើម្បីគាំទ្រអតីតសាធារណរដ្ឋសូវៀត។
លោកបានលើកជាឧទាហរណ៍ថា «ទីតាំងរបស់លោកខាងលិច ពេលខ្លះរំឭកខ្ញុំពីបុរសម្នាក់ ដែលកំពុងអង្គុយក្នុងឡាន ហើយឃើញនរណាម្នាក់ហៀប នឹងត្រូវគេវាយ គាត់បក់ដៃ ហើយនិយាយថា ‘ល្អ ពេលអ្នកត្រូវគេវាយ យើងនឹងហៅរកជំនួយពីគ្រូពេទ្យ»
យោងតាមរដ្ឋមន្ត្រី “ជំនួសឱ្យការពិភាក្សាគ្នា” សម្ព័ន្ធមិត្តលោកខាងលិចរបស់អ៊ុយក្រែន គួរតែបញ្ឈប់បំពង់បង្ហូរប្រេង Nord Stream 2 ដ៏ចម្រូងចម្រាស ផ្តល់ “អាវុធបន្ថែមទៀតពីប្រទេសនានា” ដែលមិនផ្តល់គ្រឿងសព្វាវុធ និងផ្តល់ “ជំនួយក្នុងទម្រង់នៃការធានាសេដ្ឋកិច្ច”។
ការលើកឡើងរបស់លោក Tkachenko ធ្វើឡើងបន្ទាប់ ពីមានការថ្កោលទោសពីទីក្រុងគៀវ ជុំវិញការបដិសេធ របស់ប្រទេសអាល្លឺម៉ង់ក្នុងការអនុញ្ញាតឱ្យផ្ទេរ អាវុធធុនធ្ងន់ទៅកាន់ប្រទេសនេះ ដោយបានសម្តែងការរិះគន់ ចំពោះមុខការឈ្លានពាន របស់រុស្ស៊ីដែលជិតមកដល់។ កាលពីសប្តាហ៍មុន ឯកអគ្គរដ្ឋទូត អ៊ុយក្រែន ប្រចាំប្រទេសអាឡឺម៉ង់ លោក Andrey Melnik បានរិះគន់ទី ក្រុងប៊ែរឡាំង ចំពោះការសម្រេច ចិត្តរបស់ខ្លួនក្នុងការ ផ្តល់មួកយោធា ចំនួន 5,000 ទោះបីជាប្រទេសអឺរ៉ុប ខាងកើត មានការស្នើសុំគ្រឿង សព្វាវុធក៏ដោយ៕
ប្រែសម្រួលៈ ណៃ តុលា
