បរទេស៖ រដ្ឋមន្ត្រីការបរទេសអាល្លឺម៉ង់លោកស្រី Annalena Baerbock បាននិយាយកាលពីថ្ងៃអង្គារថា ប្រទេសអាល្លឺម៉ង់ នឹង “មិនអាចធ្វើដំណើរបានឡើយ” ប្រសិនបើគ្មានការនាំចូលប្រេងពីរុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី៨ ខែមីនា ឆ្នាំ២០២២ បានឱ្យដឹងថា ខណៈពេលដែលចក្រភពអង់គ្លេស និងសហរដ្ឋអាមេរិក បានប្រកាសថា ពួកគេនឹងឈប់ទិញប្រេង ពីទីក្រុងមូស្គូមកនោះ ប្រទេសអាល្លឺម៉ង់ មានការពឹងផ្អែកខ្លាំងលើរុស្ស៊ី។
លោកស្រី Baerbock បានប្រាប់បណ្តាញវីដេអូ របស់កាសែត Bild ថា “មួយភាគបី នៃការនាំចូលប្រេងរបស់យើង គឺមកពីប្រទេសរុស្ស៊ី” ។ “ប្រសិនបើយើងបញ្ឈប់វាភ្លាមៗ នោះថ្ងៃស្អែក យើងនឹងមិនអាចដំណើរការ នៅក្នុងប្រទេសអាល្លឺម៉ង់ បានទៀតទេ”។
លោកស្រី Baerbock បានបន្តទៀតថា “យើងកំពុងព្យាយាមធ្វើអ្វីគ្រប់យ៉ាង ដែលយើងអាចធ្វើបាន ដើម្បីបញ្ឈប់សង្រ្គាមនេះ” ដោយសំដៅលើជម្លោះ ដែលកំពុងបន្តរវាងអ៊ុយក្រែន និងរុស្ស៊ី មុននេះអះអាងថា ប្រធានាធិបតីរុស្ស៊ីលោក Vladimir Putin បច្ចុប្បន្នគឺ “មិនអាចបញ្ឈប់បាន” ៕ ប្រែសម្រួលៈ ណៃ តុលា
