តូក្យូ៖ រដ្ឋាភិបាលបានឲ្យដឹងថា ប្រទេសជប៉ុននឹងបញ្ចេញប្រេងបម្រុងចំនួន ១៥លានបារ៉ែលបន្ថែមទៀត នៅក្នុងកិច្ចខិតខំប្រឹងប្រែងសម្របសម្រួល ដោយសមាជិកនៃទីភ្នាក់ងារថាមពលអន្តរជាតិ ដើម្បីធ្វើឱ្យមានស្ថិរភាពទីផ្សារ ចំពេលមានការឈ្លានពាន របស់រុស្ស៊ីលើអ៊ុយក្រែន។
ការចេញផ្សាយនេះ ប៉ះពាល់ទាំងទុនបម្រុងឯកជន និងរដ្ឋ នឹងក្លាយជាផ្នែកមួយដ៏ធំបំផុត របស់ប្រទេស។ IEA ដែលមានសមាជិកចំនួន ៣១ប្រទេស ដែលកំពុងឆ្ពោះទៅមុខជាមួយនឹងការបញ្ចេញស្តុកប្រេងសរុបចំនួន ១២០លានបារ៉ែល ដែលដឹកនាំដោយសហរដ្ឋអាមេរិក។
នាយករដ្ឋមន្ត្រីជប៉ុនលោក ហ្វូមីអូ គីស៊ីដា បានលើកឡើងថា វិភាគទានរបស់ជប៉ុន គឺធំជាងគេទីពីរបន្ទាប់ពី ៦០លានបារ៉ែលពីសហរដ្ឋអាមេរិក នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
លោក គីស៊ីដា បានប្រាប់អ្នកយកព័ត៌មានថា “ប្រទេសជប៉ុន នឹងធ្វើអ្វីដែលខ្លួនអាចធ្វើបានមុនកាលវិភាគ” ។ ជប៉ុនបានសន្យាមុននេះក្នុងការបញ្ចេញប្រេងចំនួន ៧,៥ លានបារ៉ែល ដែលស្មើនឹងការប្រើប្រាស់ក្នុងស្រុកប្រហែល៤ថ្ងៃ។
គិតត្រឹមចុងខែមករា ប្រទេសជប៉ុនបានរក្សាស្តុកប្រេងដែលមានសមត្ថភាពគ្របដណ្តប់ ១៤៦ថ្ងៃ នៅក្នុងទុនបំរុងរបស់រដ្ឋ និង ៨៧ថ្ងៃនៅក្នុងទុនបម្រុងឯកជន។ ហើយក៏មានទុនបម្រុងសម្រាប់រយៈពេល ៣ថ្ងៃទៀត ក្នុងកិច្ចសហប្រតិបត្តិការជាមួយប្រទេសផលិតប្រេង។
គួរបញ្ជាក់ថា IEA បានយល់ព្រមនៅក្នុង កិច្ចប្រជុំថ្នាក់រដ្ឋមន្ត្រីវិសាមញ្ញមួយកាលពីដើមខែនេះថា ការបញ្ចេញស្ដុកប្រេងបន្ថែម គឺចាំបាច់ដើម្បីធ្វើឱ្យមាន ស្ថិរភាពទីផ្សារថាមពលពិភពលោក៕
ប្រែសម្រួល ឈូក បូរ៉ា
