គៀវ ៖ ទីភ្នាក់ងារចិនស៊ិនហួ ចេញផ្សាយនៅថ្ងៃព្រហស្បតិ៍នេះ បានឲ្យដឹងថាប្រទេសអង់គ្លេស និងប្រទេសអ៊ុយក្រែន បានឈានទៅដល់ការ ចុះកិច្ចព្រមព្រៀង ពាណិជ្ជកម្មមួយ ស្តីអំពីការលើកលែង ពន្ធនាំចូលព្រម ទាំងកូតាពន្ធមួយចំនួន ផ្សេងទៀតផង។
សេចក្តីប្រកាស ដែលត្រូវបានធ្វើឡើង ដោយក្រសួងសេដ្ឋកិច្ចជាតិ របស់អ៊ុយក្រែន បានបន្តទៀតដែរថា អ៊ុយក្រែន និងអង់គ្លេស បានកំណត់យកច្បាប់រួមគ្នា ក្នុងការលប់ចោលនូវពន្ធនាំចូល ទាំងអស់ ព្រមទាំងកូតាពន្ធក្នុងច្បាប់ ពាណិជ្ជកម្ម រវាងប្រទេសទាំងសងខាង តាមរយៈកិច្ចព្រមព្រៀង ពាណិជ្ជកម្មមួយ។
ទោះបីជាយ៉ាងណាក្តី កិច្ចព្រមព្រៀង អនុគ្រោះពន្ធនេះនឹងមានសុពលភាព ត្រឹមតែ១២ខែប៉ុណ្ណោះ ប៉ុន្តែរំពឹងទុកថា នឹងអាចជម្រុញការនាំចេញ នូវទំនិញដែលមានគុណ ភាពខ្ពស់ ពីប្រទេសអ៊ុយក្រែន ដែលភាគច្រើន រួមមានដូចជាម្សៅ គ្រាប់ធញ្ញជាតិ ផលិតផល ទឹកដោះគោ ទឹកប៉េងប៉ោះ ទឹកឃ្មុំ ពោត ស្រូវសាលី ទឹកផ្លែឈើ ផ្សិត និងស្ករជាដើម ៕
ប្រែសម្រួល៖ស៊ុនលី
