អ៊ុយក្រែន នឹងមិនធ្វើកិច្ចព្រមព្រៀង ណាមួយជាមួយរុស្ស៊ីនោះឡើយ បើធ្វើឲ្យជម្លោះសព្វថ្ងៃជាប់គាំង

គៀវ ៖ ទីភ្នាក់ងារសារព័ត៌មាន Ukrinform បានរាយការណ៍កាលពីថ្ងៃពុធថា ប្រធានាធិបតី អ៊ុយក្រែន លោក Volodymyr Zelensky បាននិយាយថា ក្រុងគៀវ នឹងមិនយល់ព្រម ចំពោះកិច្ចព្រមព្រៀងណាមួយ ដែលនឹងនាំឱ្យមាន “ជម្លោះជាប់គាំង” ជាមួយប្រទេសរុស្ស៊ីនោះទេ។

លោក Zelensky បានលើកឡើងថា “យើងនឹងមិនដោះស្រាយជម្លោះ ដែលបង្កកនោះទេ ខ្ញុំប្រឆាំងនឹងវា។ យើងប្រាកដជាមិនមានឯកសារបែបនេះទេ” នេះបើយោងតាមការ ចុះផ្សាយរបស់ទីភ្នាក់ងារ សារព័ត៌មានចិនស៊ិនហួ ។

លោក Zelensky បានបន្ដថា កិច្ចព្រមព្រៀងទីក្រុង Minsk ដែលបានបញ្ចប់ដំណាក់កាលយោធាដ៏ខ្លាំងក្លានៃជម្លោះនៅតំបន់ Donbass កាលពីប៉ុន្មានឆ្នាំមុន បង្ហាញថាគ្មានប្រសិទ្ធភាព។

លោក Zelensky បានបន្ថែមថាប្រទេសរុស្ស៊ី បានដកខ្លួនចេញពីកិច្ចព្រមព្រៀងទីក្រុង Minsk នៅពេលដែលវាវាយប្រហារអ៊ុយក្រែននៅថ្ងៃទី២៤ ខែកុម្ភៈ។

កិច្ចព្រមព្រៀងទីក្រុង Minsk ដែលសម្រេច បានក្នុងខែកញ្ញា ឆ្នាំ២០១៤ និងខែកុម្ភៈ ឆ្នាំ២០១៥ រៀងគ្នា បានគូសបញ្ជាក់ ពីជំហានដែលត្រូវការ ដើម្បីបញ្ចប់ជម្លោះនៅក្នុងតំបន់ Donbass ភាគខាងកើតរបស់ប្រទេសអ៊ុយក្រែន ដែលបានចាប់ផ្តើម នៅក្នុងខែមេសា ឆ្នាំ២០១៤៕

ប្រែសម្រួល ឈូក បូរ៉ា