ព័ត៌មានអន្តរជាតិ

Update៖ ក្រុងម៉ូស្គូ ព្រមានដល់ហ្រ្វាំងឡង់ ជុំវិញការស្នើចូលជាសមាជិកភាព អង្គការ NATO ខណៈអ៊ុយក្រែន លើកពីករណីកប៉ាល់ រុស្ស៊ី ខូចនៅសមុទ្រខ្មៅ

HELSINKI៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៣ ខែឧសភា ឆ្នាំ២០២២ថា កាលពីថ្ងៃព្រហស្បតិ៍ ទីក្រុងម៉ូស្គូបានព្រមានដល់ប្រទេសហ្វាំងឡង់ ថា ខ្លួននឹងប្រឈមមុខនឹង ផលវិបាក ខណៈដែលខ្លួនស្វែងរកការស្នើសុំ សមាជិកភាពអង្គការ NATO “ដោយគ្មានការពន្យាពេល” ហើយអ៊ុយក្រែន វិញបានលើកឡើងថា ខ្លួនបានធ្វើឱ្យខូចខាតដល់កប៉ាល់ដឹកជញ្ជូនរបស់កងទ័ពជើងទឹករុស្ស៊ី នៅឯសមុទ្រខ្មៅ ដែលជាកន្លែងដែលមានការប្រយុទ្ធគ្នាជាថ្មីនៅក្នុង ប៉ុន្មានថ្ងៃនាពេលថ្មីៗនេះ ។

លោក Serhiy Bratchuk អ្នកនាំពាក្យរដ្ឋបាលយោធាក្នុងតំបន់ Odesa នៅភាគខាងត្បូង អ៊ុយក្រែន បានលើកឡើងថា នាវា Vsevolod Bobrov ស្ថិតនៅក្បែរកោះពស់ ជិតព្រំដែនសមុទ្រអ៊ុយក្រែនជាមួយប្រទេសរ៉ូម៉ានី ។

លោក Bratchuk បានលើកឡើងថា “អរគុណចំពោះសកម្មភាព របស់ទាហានជើងទឹករបស់យើង នាវាគាំទ្រ Vsevolod Bobrov បានឆេះ វាគឺជានាវាថ្មីបំផុតមួយនៅក្នុងកងនាវារុស្ស៊ី” ។

ទីភ្នាក់ងារព័ត៌មាន Reuters មិនអាចធ្វើការផ្ទៀងផ្ទាត់ព័ត៌មានលម្អិតដោយឯករាជ្យបាននោះទេ ។ ក្រសួងការពារជាតិរុស្ស៊ី មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយទេ។ នាវាចម្បាំងនៅឯសមុទ្រខ្មៅ Moskva បានលិចកាលពីខែមុន ។

គួរបញ្ជាក់ថា ផែនការរបស់ប្រទេសហ្វាំងឡង់ក្នុងការដាក់ពាក្យសុំចូលជាសមាជិក NATO ដែលបានប្រកាសកាលពីថ្ងៃព្រហស្បតិ៍ និងការរំពឹងទុក ដែលស៊ុយអែត នឹងធ្វើតាមនោះនឹងនាំ មកនូវការពង្រីកសម្ព័ន្ធភាពយោធា លោកខាងលិច ដែលប្រធានាធិបតីរុស្ស៊ី លោក វ្ល៉ាឌីមៀ ពូទីន មានគោលបំណងរារាំង ។

ការបោះបង់ចោលអព្យាក្រឹតភាពដែលពួកគេបានរក្សាជាយូរមកហើយជាមួយសង្រ្គាមត្រជាក់នឹងជាការផ្លាស់ប្តូរដ៏ធំបំផុតមួយនៅក្នុងសន្តិសុខអឺរ៉ុបក្នុងរយៈពេលជាច្រើនទសវត្សរ៍មកនេះ ។

ទីក្រុងម៉ូស្គូ បានហៅការប្រកាស របស់ហ្វាំងឡង់ថា ជាអរិភាព និងគំរាមកំហែងការសងសឹក រួមទាំងវិធានការ “បច្ចេកទេសយោធា” ដែលមិនត្រូវបានបញ្ជាក់ឲ្យដឹងច្បាស់លាស់នោះទេ ៕

ដោយ៖ ម៉ៅ បុប្ផាមករា

To Top