គៀវ៖ ថ្លែងទៅកាន់ប្រជាជាតិ នៅក្នុងសុន្ទរកថាប្រចាំថ្ងៃលើកទី១០៩ របស់លោកចាប់តាំងពីការចាប់ផ្តើម នៃការលុកលុយរបស់រុស្ស៊ី ប្រធានាធិបតីអ៊ុយក្រែនលោក Zelenskyy បានឲ្យដឹងថា ការស្លាប់របស់រុស្ស៊ី អាចលើសពី ៤ម៉ឺននាក់ក្នុងខែនេះ។
ទន្ទឹមនឹងនេះដែរ មនុស្សយ៉ាងហោចណាស់ ២២ នាក់បានរងរបួសនៅក្នុងការវាយប្រហារដោយកាំជ្រួចរបស់រុស្ស៊ី នៅភាគខាងលិចអ៊ុយក្រែន ដែលបានបំផ្លាញផ្នែកខ្លះនៃមូលដ្ឋានយោធា និងអគារផ្ទះល្វែងចំនួន ៤ផងដែរ។
ស្ពានចុងក្រោយដែលតភ្ជាប់ពី Severodonetsk ទៅកាន់ប្រទេសអ៊ុយក្រែនផ្សេងទៀត បានរងការបាញ់ដោយកាំភ្លើងធំពីកងកម្លាំងរុស្ស៊ី ហើយស្ពាននេះហើយ ដែលត្រូវបានគេស្គាល់ថា ជាច្រកសំខាន់សម្រាប់ការគេចខ្លួន របស់កងកម្លាំងអ៊ុយក្រែន។
កាលពីថ្ងៃអាទិត្យផងដែរ មន្ត្រីដែលដំឡើងដោយវិមានក្រឹមឡាំង នៅភាគខាងត្បូងអ៊ុយក្រែន បានប្រារព្ធទិវារុស្សី ហើយបានចាប់ផ្តើមចេញលិខិតឆ្លងដែនរុស្ស៊ី ដល់អ្នករស់នៅក្នុងទីក្រុងមួយដែលបានស្នើសុំពួកគេ ខណៈដែលទីក្រុងម៉ូស្គូព្យាយាមពង្រឹងការគ្រប់គ្រងរបស់ខ្លួន លើផ្នែកដែលត្រូវបានកាន់កាប់។
ផ្លាកសញ្ញាទីក្រុងថ្មី ដែលលាបពណ៌ទង់ជាតិរុស្ស៊ី ត្រូវបានដាក់បង្ហាញនៅជាយក្រុង Mariupol កាលពីថ្ងៃអាទិត្យ ដោយជំនួសវិមាន ដែលមានពណ៌ខៀវ និងមាសរបស់អ៊ុយក្រែន។
ទង់ជាតិរុស្ស៊ីក៏កំពុងត្រូវបានបក់រវិចៗ នៅលើផ្លូវហាយវេចូលទៅក្នុង ទីក្រុងកំពង់ផែ ដែលឥឡូវនេះស្ថិតនៅក្រោម ការគ្រប់គ្រងទាំងស្រុងរបស់កងកម្លាំង ដែលគាំទ្រដោយទីក្រុងម៉ូស្គូ៕ ប្រែសម្រួល ឈូក បូរ៉ា
