វ៉ាស៊ីនតោន៖ ប្រធានមូលនិធិរូបិយវត្ថុអន្តរជាតិ (IMF) បានឲ្យដឹងថា មានផ្លូវតូចចង្អៀតណាស់ ដើម្បីជៀសវាងពីការធ្លាក់ចុះ សេដ្ឋកិច្ចរបស់អាមេរិក ដោយគូសបញ្ជាក់ពី “ហានិភ័យធ្លាក់ចុះយ៉ាងសំខាន់”។
នាយកគ្រប់គ្រង IMF លោកស្រី Kristalina Georgieva បានឲ្យដឹងនៅក្នុងសន្និសីទសារព័ត៌មានប្រចាំឆ្នាំថា “ដោយផ្អែកលើផ្លូវគោលនយោបាយ ដែលបានលើកឡើងនៅក្នុងកិច្ចប្រជុំ FOMC (គណៈកម្មាធិការទីផ្សារបើកចំហសហព័ន្ធ) ខែមិថុនា និងការកាត់បន្ថយការរំពឹងទុក នៃឱនភាពសារពើពន្ធ យើងរំពឹងថា សេដ្ឋកិច្ចអាមេរិក នឹងធ្លាក់ចុះ” ។
លោកស្រី Georgieva បានលើកឡើងថា IMF ជឿថាផ្លូវសម្រាប់អត្រាគោលនយោបាយ ដែលធនាគារកណ្តាល សហព័ន្ធបានផ្តល់សញ្ញា ដើម្បីទទួលបានអត្រាមូលនិធិ សហព័ន្ធយ៉ាងឆាប់រហ័សដល់ ៣,៥ ទៅ ៤ភាគរយ គឺជាគោលនយោបាយត្រឹមត្រូវ ដើម្បីកាត់បន្ថយអតិផរណា។
លោកស្រី Georgieva បានបន្ដថា “យើងដឹងហើយថា មានផ្លូវចង្អៀតមួយ ដើម្បីជៀសវាងវិបត្តិសេដ្ឋកិច្ច នៅសហរដ្ឋអាមេរិក យើងក៏ត្រូវទទួលស្គាល់ភាពមិនច្បាស់លាស់ នៃស្ថានភាពបច្ចុប្បន្ន” ។
ប្រធាន IMF រូបនេះបានបន្ថែមថា IMF យកចិត្តទុកដាក់ចំពោះហានិភ័យ នៃសេដ្ឋកិច្ចសហរដ្ឋអាមេរិក។ លោកស្រីបានលើកឡើងថា “យើងពិតជាបានឃើញហានិភ័យ ធ្លាក់ចុះយ៉ាងខ្លាំងនៅឆ្នាំនេះ និងជាពិសេសនៅឆ្នាំក្រោយ” ដោយកត់សម្គាល់ថា ភាពរង្គោះរង្គើសំខាន់ៗកំពុងជះឥទ្ធិពល ដល់សេដ្ឋកិច្ចពីជម្លោះរុស្ស៊ី-អ៊ុយក្រែន និងពីការចាក់សោរនៅក្នុងប្រទេសចិន។
ទន្ទឹមនឹងនេះ លោកស្រី Georgieva បានបន្ថែមថា សេដ្ឋកិច្ចចូលក្នុងដំណាក់កាលនៃ ការរឹតបន្តឹងនេះជាមួយនឹង តារាងតុល្យការសាជីវកម្ម និងគ្រួសារដ៏រឹងមាំ ហើយការសន្សំសំខាន់ៗដែលប្រមូលបានគឺជា “ខ្នើយ” ដែលផ្តល់នូវការលើកទឹកចិត្តមួយចំនួន សម្រាប់សេដ្ឋកិច្ច ដើម្បីដំណើរការ៕
ប្រែសម្រួល ឈូក បូរ៉ា
