គៀវ៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី៤ ខែកក្កដា ឆ្នាំ២០២២ថា កាលពីថ្ងៃអាទិត្យ លោក Volodymyr Zelenskyy ប្រធានាធិបតីអ៊ុយក្រែន បានទទួលស្គាល់ថា កងកម្លាំងរបស់ទីក្រុង Kyiv បានដកខ្លួនចេញពី ក្រុងLysychansk ក្នុងតំបន់ Donbas នៅភាគខាងកើត បន្ទាប់ពីការវាយលុករបស់រុស្ស៊ី ប៉ុន្តែបានប្តេជ្ញាថា នឹងគ្រប់គ្រងតំបន់នេះឡើងវិញ ដោយមានជំនួយពីអាវុធ លោកខាងលិច ។
រុស្ស៊ី បានឲ្យដឹងថា ការដណ្តើមយកទីក្រុង Lysychansk របស់ខ្លួនប្រើពេលមិនដល់មួយសប្តាហ៍ទេ បន្ទាប់ពីការកាន់កាប់ ក្រុងSievierdonetsk ដែលជាក្រុងជិតគ្នាបានផ្តល់ឱ្យរុស្ស៊ី នូវការគ្រប់គ្រងពេញលេញនៃតំបន់ Luhansk ភាគខាងកើត ដែលជាការឈ្នះនយោបាយដែលឆ្លើយតប នឹងគោលដៅសំខាន់ នៃសង្រ្គាមវិមានក្រឹមឡាំង ។ ការផ្តោតលើសមរភូមិពេលនេះ បានផ្លាស់ប្តូរទៅកាន់តំបន់ Donetsk ដែលនៅជិតខាង ដែលទីក្រុង គៀវ នៅតែគ្រប់គ្រងទឹកដីជាច្រើនដដែល ។
លោក Zelenskyy បានថ្លែងដោយគូសបញ្ជាក់ នៅក្នុងវីដេអូពេលយប់របស់គាត់ថា “ប្រសិនបើមេបញ្ជាការនៃកងទ័ពរបស់យើង ដកមនុស្សចេញពីចំណុចជាក់លាក់នៅខាងមុខ ជាកន្លែងដែលសត្រូវមាន អត្ថប្រយោជន៍ដ៏អស្ចារ្យបំផុត នៅក្នុងការវាយលុក ហើយនេះក៏អនុវត្តចំពោះក្រុង Lysychansk ដែរ វាមានន័យតែមួយគត់” ។
លោកបានបញ្ជាក់ថា “យើងនឹងត្រឡប់មកវិញ ដោយអរគុណ ចំពោះកលល្បិចរបស់យើង ដោយសារការកើនឡើង នៃការផ្គត់ផ្គង់អាវុធទំនើបៗ” ។
លោក Zelenskyy បានថ្លែងថា ប្រទេសរុស្ស៊ី កំពុងផ្តោតការយកចិត្តទុកដាក់ លើកម្លាំងបាញ់របស់ខ្លួន នៅលើរណសិរ្ស Donbas ប៉ុន្តែអ៊ុយក្រែន នឹងវាយបកវិញជាមួយនឹងអាវុធ រយៈចម្ងាយឆ្ងាយ ដូចជាគ្រាប់រ៉ុក្កែត HIMARS ដែលផ្គត់ផ្គង់ដោយសហរដ្ឋអាមេរិក៕ ប្រែសម្រួលដោយ៖ ម៉ៅ បុប្ផាមករា
