បរទេស៖ យ៉ាងហោចណាស់មនុស្ស ១៨នាក់បានស្លាប់ និងជាច្រើននាក់ទៀតរងរបួស នៅក្នុងការបាញ់ប្រហារដ៏ធំចំនួនពីរនៅប្រទេសអាហ្វ្រិកខាងត្បូង កាលពីល្ងាចថ្ងៃសៅរ៍ និងនៅព្រឹកព្រលឹមថ្ងៃអាទិត្យនេះ,នេះបើតាមប៉ូលីសក្នុងតំបន់បានបញ្ជាក់។
យោងតាមសារព័ត៌មាន RT ចេញផ្សាយនៅថ្ងៃទី10 ខែកក្កដា ឆ្នាំ2022 បានឱ្យដឹងថា ឧបទ្ទវហេតុមួយបានកើតឡើងនៅកន្លែងផឹកស៊ីមួយក្នុងសង្កាត់ Soweto នៃទីក្រុង Johannesburg បន្ទាប់ពីកណ្តាលអធ្រាត្រ។ យោងតាមការិយាល័យរបស់ស្នងការប៉ូលីស Gauteng បានឱ្យដឹងថា “បុរសមួយក្រុមប្រដាប់ដោយកាំភ្លើងវែងនិងកាំភ្លើងខ្លី 9mm បានចូលទៅក្នុងហាងផឹកស៊ីនោះ ហើយបានចាប់ផ្តើមបាញ់ព្រាវៗ ទៅលើអ្នកដែលអង្គុយនៅខាងក្នុងនោះ” ។
របាញ់ប្រហារនោះ បានបណ្តាលឱ្យមនុស្ស១២នាក់ត្រូវបានគេប្រកាសថាស្លាប់នៅកន្លែងកើតហេតុ និង២នាក់ទៀតស្លាប់ នៅពេលក្រោយមក និង៩នាក់បានរងរបួស។
ប៉ូលីសបាននិយាយថា “ប៉ូលីសបានបើកករណីឃាតកម្មចំនួន 14 និងករណីប៉ុនប៉ងមនុស្សឃាតចំនួន 9” ដោយបន្ថែមថា “ក្រុមអ្នកស៊ើបអង្កេត” ឥឡូវនេះកំពុងស្វែងរកខ្មាន់កាំភ្លើងមិនស្គាល់អត្តសញ្ញាណ។
តាមការប៉ាន់ស្មានរបស់ប៉ូលិស ជនរងគ្រោះមានអាយុចន្លោះពី ១៩ ទៅ ៣៥ ឆ្នាំ៕
ប្រែសម្រួលៈ ណៃ តុលា
