បរទេស៖ ឯកអគ្គរដ្ឋទូតរុស្ស៊ីប្រចាំ ទីក្រុងព្យុងយ៉ាងបាននិយាយកាលពីថ្ងៃអង្គារថា ប្រទេសកូរ៉េខាងជើងអាចបញ្ជូនអ្នកសាងសង់ទៅកាន់តំបន់ បំបែកខ្លួនរបស់អ៊ុយក្រែនភាគខាងកើត ដើម្បីជួយក្នុង “ការកសាងឡើងវិញ” បន្ទាប់ពីពួកគេត្រូវបានបំផ្លិចបំផ្លាញ ដោយសង្រ្គាមជាច្រើនខែ។
យោងតាមសារព័ត៌មាន The Moscow Times ចេញផ្សាយកាលពីថ្ងៃទី១៩ ខែកក្កដា ឆ្នាំ២០២២ បានឱ្យដឹងថា ឯកអគ្គរដ្ឋទូត Alexander Matsegora បានប្រាប់កាសែត Izvestia ប្រចាំថ្ងៃដែលគាំទ្រវិមានក្រឹមឡាំង ដោយដាក់ពង្រាយចំណុចនិយាយរបស់វិមានក្រឹមឡាំង ដោយផ្អែកលើការអះអាងមិនពិតដែលថារដ្ឋាភិបាលទីក្រុង Kyiv ត្រូវបានគ្រប់គ្រងដោយពួកណាស៊ីថា “មានសមត្ថភាពខ្ពស់ ឧស្សាហ៍ព្យាយាម និងត្រៀមខ្លួនជាស្រេចដើម្បីធ្វើការក្នុងស្ថានភាពលំបាកបំផុត អ្នកសាងសង់កូរ៉េនឹងក្លាយជាទ្រព្យសកម្មក្នុងកិច្ចការដ៏ធ្ងន់ធ្ងរនៃការស្ដារឡើងវិញនូវបរិក្ខារសង្គម ហេដ្ឋារចនាសម្ព័ន្ធ និងឧស្សាហកម្ម [នៅដុនបាស] ដែលបំផ្លាញដោយពួកណាស៊ីអ៊ុយក្រែន ដែលដកថយ”។
សូមជម្រាបថា ប្រទេសកូរ៉េខាងជើងកាលពីសប្តាហ៍មុនបានក្លាយជារដ្ឋទី៣ បន្ទាប់ពីរុស្ស៊ី និងស៊ីរី ដែលបានទទួលស្គាល់ជាផ្លូវការនូវសាធារណរដ្ឋប្រជាមានិត Donetsk និង Luhansk ដែលជាតំបន់ដាច់ស្រយាលពីរដែលគាំទ្រដោយវិមានក្រឹមឡាំង ចេញពីប្រទេសអ៊ុយក្រែនដែលហៅថា Donbas ។
មេដឹកនាំនៃសាធារណរដ្ឋប្រជាមានិត Donetsk លោក Denis Pushilin បានសាទរចំពោះការទទួលស្គាល់របស់កូរ៉េខាងជើងថាជា “ជ័យជំនះនៃការទូត” សម្រាប់តំបន់ដែលបំបែកខ្លួន ហើយបានសម្តែងក្តីសង្ឃឹមសម្រាប់ “កិច្ចសហប្រតិបត្តិការសកម្ម និងប្រកបដោយផ្លែផ្កា” ជាមួយដៃគូអាស៊ីដែលទើបទទួលបានថ្មីនេះ៕ប្រែសម្រួលៈ ណៃ តុលា
