បរទេស៖ ឧត្តមសេនីយកំពូលរបស់អាមេរិក បានប្រកាសដោយព្រមានចំពោះយោធាចិន ដោយនិយាយថា វាកាន់តែឈ្លានពានក្នុងការជួបជាមួយ កងកម្លាំងយោធាផ្សេងទៀតដែលកំពុងប្រតិបត្តិការ នៅក្នុងតំបន់អាស៊ីប៉ាស៊ីហ្វិក ដែលធ្វើឲ្យខ្លួនវា (ចិន) ក្លាយជាការគំរាមកំហែង កាន់តែខ្លាំងចំពោះសហរដ្ឋអាមេរិក និងសម្ព័ន្ធមិត្តរបស់ខ្លួន។
យោងតាមសារព័ត៌មាន RT ចេញផ្សាយកាលពីថ្ងៃទី២៤ ខែកក្កដា ឆ្នាំ២០២២ បានឱ្យដឹងថា ឧត្តមសេនីយឯក Mark Milley ប្រធានអគ្គសេនាធិការចម្រុះ បាននិយាយកាលពីថ្ងៃអាទិត្យ អំឡុងពេលទស្សនកិច្ច នៅប្រទេសឥណ្ឌូនេស៊ីថា “សារនេះគឺ យោធាចិនទាំងនៅលើអាកាស និងនៅសមុទ្រ កាន់តែមានភាពឈ្លានពាន និងគួរឱ្យកត់សម្គាល់នៅក្នុងតំបន់ពិសេសនេះ” ។
លោក Milley បាននិយាយថា ការស្ទាក់ចាប់យន្តហោះ និងកប៉ាល់របស់សហរដ្ឋអាមេរិក និងសម្ព័ន្ធមិត្តដោយកងកម្លាំងចិនបានកើនឡើងយ៉ាងខ្លាំង ក្នុងរយៈពេល៥ឆ្នាំកន្លងមកនេះ។ ចំនួននៃអន្តរកម្មបែបនេះត្រូវបានចាត់ទុកថា “មិនមានសុវត្ថិភាព” ដោយមន្ទីរបញ្ចកោណ បានកើនឡើងស្រដៀងគ្នា។ នាពេលថ្មីៗនេះ ឧត្តមសេនីយ៍បានបញ្ជាឱ្យ បុគ្គលិករបស់លោកចងក្រងរបាយការណ៍ដែលរៀបរាប់លម្អិត អំពីអន្តរកម្មរវាងកងកម្លាំងចិន និងសហរដ្ឋអាមេរិក និងសម្ព័ន្ធមិត្តនៅក្នុងតំបន់៕
ប្រែសម្រួល៖ ណៃ តុលា
