ព័ត៌មានអន្តរជាតិ

អ៊ីរ៉ង់​៖ ស្នើពន្លឿន​ការ​ចរចា​នុយក្លេអ៊ែរ ហើយភាគីផ្សេងទៀត ក៏ត្រូវធ្វើដូចគ្នា

តេអេរ៉ង់៖ អ្នកចរចាកំពូលរបស់ អ៊ីរ៉ង់បានឲ្យដឹងថា អ៊ីរ៉ង់បានបញ្ជូនគំនិត ដែលបានស្នើឡើងនៅក្នុង “ទាំងខ្លឹមសារ និងទម្រង់” ទៅភាគីម្ខាងទៀតនៃកិច្ចចរចានៅទីក្រុងវីយែន ស្តីពីការរស់ឡើងវិញនូវកិច្ចព្រមព្រៀង នុយក្លេអ៊ែរឆ្នាំ២០១៥ ដើម្បីត្រួសត្រាយផ្លូវសម្រាប់ “ការបញ្ចប់យ៉ាងឆាប់រហ័ស” នៃកិច្ចចរចា។

លោក Ali Bagheri Kani ដែលជាអនុរដ្ឋមន្ត្រីការបរទេសអ៊ីរ៉ង់ទទួលបន្ទុកកិច្ចការនយោបាយ បានឲ្យដឹងនៅលើបណ្ដាញ Twitter ថា ទីក្រុងតេអេរ៉ង់ បានត្រៀមខ្លួនរួចជាស្រេច ដើម្បីបញ្ចប់ការចរចា ក្នុងរយៈពេលដ៏ខ្លី ដោយផ្តល់ថាភាគីផ្សេងទៀត ក៏នឹងត្រៀមធ្វើដូចគ្នាដែរ។

លោក Bagheri Kani បានបន្ថែមថា កិច្ចចរចានុយក្លេអ៊ែរដែលបានចាប់ផ្តើម នៅរដ្ឋធានីអូទ្រីស ក្នុងខែមេសា ឆ្នាំ២០២១ គឺសំដៅ “ជួសជុលស្ថានការណ៍ដ៏ស្មុគស្មាញ ដែលបង្កឡើងដោយការដកខ្លួនដោយឯកតោភាគី និងខុសច្បាប់របស់សហរដ្ឋអាមេរិក” ពីកិច្ចព្រមព្រៀងនុយក្លេអ៊ែរ ដែលត្រូវបានគេស្គាល់ជាផ្លូវការថា ជាផែនការសកម្មភាពទូលំទូលាយរួម ( JCPOA) ក្នុងឆ្នាំ២០១៨។

លោកបានផ្តល់ការធានាថា អ៊ីរ៉ង់កំពុងធ្វើការយ៉ាងជិតស្និទ្ធជាមួយដៃគូ JCPOA របស់ខ្លួន ជាពិសេសប្រធានគោលនយោបាយ ការបរទេសសហភាពអឺរ៉ុប និងអ្នកសម្របសម្រួល នៃគណៈកម្មការចម្រុះ JCPOA លោក Josep Borrell ដើម្បីផ្តល់ឱកាសឱ្យសហរដ្ឋអាមេរិកម្តងទៀតដើម្បីបង្ហាញពី “ជំនឿល្អ” របស់ខ្លួន និង “ធ្វើសកម្មភាពប្រកបដោយការទទួលខុសត្រូវ”។

ប្រទេសអ៊ីរ៉ង់បានចុះហត្ថលេខាលើ JCPOA ជាមួយមហាអំណាចពិភពលោក កាលពីខែកក្កដា ឆ្នាំ២០១៥ ដោយយល់ព្រមទប់ស្កាត់កម្មវិធី នុយក្លេអ៊ែររបស់ខ្លួនជាថ្នូរនឹងការដកទណ្ឌកម្មលើប្រទេសនេះ។

ទោះបីជាយ៉ាងណាក៏ដោយ អតីតប្រធានាធិបតីអាមេរិក លោក ដូណាល់ ត្រាំ បានដកទីក្រុងវ៉ាស៊ីនតោន ចេញពីកិច្ចព្រមព្រៀងក្នុងខែឧសភា ឆ្នាំ២០១៨ ហើយបានដាក់ទណ្ឌកម្មឯកតោភាគីឡើងវិញលើទីក្រុងតេអេរ៉ង់ ដែលជំរុញឱ្យភាគីចុងក្រោយទម្លាក់ការប្តេជ្ញាចិត្ត មួយចំនួននៅក្រោមកតិកាសញ្ញានេះ៕

ប្រែសម្រួល ឈូក បូរ៉ា

To Top