យេរ៉ូសាឡឹម៖ នាយករដ្ឋមន្ត្រីអ៊ីស្រាអែល លោក Yair Lapid បានឲ្យដឹងថា អ៊ីស្រាអែល ប្រឆាំងនឹងកិច្ចព្រមព្រៀងនុយក្លេអ៊ែរ ដែលកំពុងចរចារវាងអ៊ីរ៉ង់ និងមហាអំណាចពិភពលោក នៅទីក្រុងវីយែន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Lapid បានប្រាប់សន្និសីទព័ត៌មានសន្តិសុខ សម្រាប់សារព័ត៌មានបរទេសនៅឯការិយាល័យ នាយករដ្ឋមន្ត្រីក្នុងទីក្រុងយេរ៉ូសាឡឹមថា “កិច្ចព្រមព្រៀងដែលត្រូវបានពិភាក្សា ដោយមហាអំណាចពិភពលោក ហើយអ៊ីរ៉ង់ មិនអាចរារាំងអ៊ីរ៉ង់ពីការអភិវឌ្ឍអាវុធនុយក្លេអ៊ែរបានឡើយ។
លោកបានលើកឡើងថា កិច្ចព្រមព្រៀងនេះ នឹងផ្តល់រង្វាន់ដល់ប្រទេសអ៊ីរ៉ង់ នូវប្រាក់រាប់ពាន់លានដុល្លារក្នុងមួយឆ្នាំ “ដែលនឹងត្រូវបានប្រើ ដើម្បីធ្វើឱ្យខូចស្ថិរភាពនៅមជ្ឈិមបូព៌ា”។
មេដឹកនាំអ៊ីស្រាអែលរូបនេះ ក៏បានព្រមានថា អ៊ីស្រាអែលនឹងមិនអនុញ្ញាតឱ្យអ៊ីរ៉ង់ ទទួលបានគ្រាប់បែកនុយក្លេអ៊ែរឡើយ។ លោកបានបន្ដថា “យើងបានបញ្ជាក់យ៉ាងច្បាស់ ដល់មនុស្សគ្រប់គ្នា៖ ប្រសិនបើកិច្ចព្រមព្រៀងមួយ ត្រូវបានចុះហត្ថលេខា វាមិនមានកាតព្វកិច្ចអ៊ីស្រាអែលនោះទេ។ យើងនឹងធ្វើសកម្មភាព ដើម្បីការពារអ៊ីរ៉ង់ពីការក្លាយជារដ្ឋនុយក្លេអ៊ែរ” ។
លោក Lapid បានបន្ថែមថា មាន “ការសន្ទនាបើកចំហ” ជាមួយរដ្ឋាភិបាលសហរដ្ឋអាមេរិក លើ “បញ្ហាទាំងអស់នៃការខ្វែងគំនិតគ្នា” ទាក់ទងនឹងកិច្ចចរចានុយក្លេអ៊ែរអ៊ីរ៉ង់។ អ៊ីរ៉ង់នៅមិនទាន់ឆ្លើយតបនឹងការចោទប្រកាន់របស់លោក Lapid នៅឡើយទេ៕ ប្រែសម្រួល ឈូក បូរ៉ា
