បរទេស៖ ភ្លៀងធ្លាក់ខ្លាំងបំផុតមិនធ្លាប់មានក្នុងរយៈពេលពីរទសវត្សរ៍នេះ ដែលបានធ្លាក់មកលើទីក្រុងបាងកក បានចាប់ផ្តើមកាលពីល្ងាចថ្ងៃអង្គារ ហើយបានគ្របដណ្ដប់លើប្រឡាយសំខាន់ៗរបស់រាជធានី ដែលធ្វើឱ្យវាពិបាកក្នុងការបង្ហូរទឹកចេញពីផ្នែកខ្លះនៃទីក្រុង។ នេះបើតាមអភិបាលក្រុងបាងកក លោក Chadchart Sittipunt បាននិយាយកាលពីថ្ងៃពុធ។
យោងតាមសារព័ត៌មាន Bangkok Post ចេញផ្សាយនៅថ្ងៃទី៨ ខែកញ្ញា ឆ្នាំ២០២២ បានឱ្យដឹងថា ជាឧទាហរណ៍ សង្កាត់ Bang Khen បានរាយការណ៍ពីទឹកភ្លៀងដែលបានធ្លាក់ក្នុងកម្រិត ១៧០ មីលីម៉ែត្រ ចាប់តាំងពីថ្ងៃអង្គារ ដែលជាចំនួនខ្ពស់បំផុតក្នុងរយៈពេល ២០ ឆ្នាំ មកនេះ។
ជាលទ្ធផល កម្រិតទឹកនៅតាមបណ្តោយ ក្លូង ឡាតប្រាវ និង ក្លូងព្រែម ប្រាចាខុន ដែលជាប្រឡាយបង្ហូរទឹកសំខាន់របស់សង្កាត់ ក៏បានហក់ឡើងផងដែរ ដែលបណ្តាលឱ្យមានការជន់លិចនៅតំបន់មួយចំនួន។
ទីតាំងដែលរងផលប៉ះពាល់ខ្លាំងបំផុតមួយចំនួនរួមមានរង្វង់មូល Bang Khen និងតំបន់ជុំវិញផ្លូវរថភ្លើងអគ្គិសនីថ្មី ដែលអភិបាលក្រុងបាននិយាយថា មួយផ្នែកត្រូវស្តីបន្ទោសចំពោះការហូរទឹកយឺត។
អភិបាលក្រុងបាងកក បាននិយាយថា រដ្ឋបាលក្រុងបាងកក (BMA) និងនាយកដ្ឋានធារាសាស្ត្រ (RID) កំពុងប្រឹងប្រែងអស់ពីសមត្ថភាព ដើម្បីបង្ហូរទឹកជន់លិចចេញពីផ្លូវនានាក្នុងទីក្រុង ប៉ុន្តែកម្ពស់ទឹកខ្ពស់នៅទូទាំងប្រឡាយសំខាន់ៗក្នុងទីក្រុង បានបង្កការលំបាក៕
