គៀវ៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី៩ ខែកញ្ញា ឆ្នាំ២០២២ថា កាលពីថ្ងៃព្រហស្បតិ៍ ប្រទេសអ៊ុយក្រែន បានអបអរសាទរ ចំពោះការវាយលុក ដោយផ្លេកបន្ទោរ ដែលខ្លួនបានប្រកាសថា បានដណ្តើមយកមកវិញ នូវទឹកដីរបស់ខ្លួននៅភាគខាងកើត និងខាងត្បូង ខណៈដែលរដ្ឋមន្ត្រីការបរទេស សហរដ្ឋអាមេរិក លោក Antony Blinken បានមកទស្សនកិច្ចក្នុងប្រទេសនេះ ដើម្បីសន្យាផ្តល់ជំនួយបន្ថែមទៀត ។
លោក Volodymyr Zelenskyy ប្រធានាធិបតីអ៊ុយក្រែន បានថ្លែងនៅក្នុងសុន្ទរកថា តាមវីដេអូថា កងកម្លាំងរបស់ទីក្រុង គៀវ បាន “រំដោះការតាំងទីលំនៅ រាប់សិបកន្លែង” និងបានដណ្តើមយកមកវិញ នូវទឹកដីចំនួន១.០០០គីឡូម៉ែត្រក្រឡា នៅភាគខាងកើត និងខាងត្បូងចាប់តាំងពីថ្ងៃទី១ ខែកញ្ញា ។
លោក Zelenskyy ក៏បានបង្ហោះវីដេអូដែលទាហានអ៊ុយក្រែន បានអះអាងថា បានដណ្តើមយកទីក្រុង Balakliia ភាគខាងកើតក្បែរក្រុង Kharkiv ដែលជាទីក្រុងធំទី២ ក្នុងប្រទេសអ៊ុយក្រែន ។ ខ្សែវីដេអូ ដែលបានបង្ហោះទៅកាន់អ្នកប្រមូលព័ត៌មាន ដ៏ពេញនិយមរបស់អ៊ុយក្រែន ហាក់ដូចជាបង្ហាញ ជនជាតិរុស្ស៊ី ទុកឡានដឹកទំនិញ កាំភ្លើងធំ និងប្រអប់គ្រាប់រំសេវ នៅពីក្រោយនោះ ។
លោក Vitaly Ganchev មន្ត្រីក្នុងស្រុក ដែលគាំទ្ររុស្ស៊ីបានប្រាប់ដល់ ទូរទស្សន៍រដ្ឋរុស្ស៊ីថា កងកម្លាំងរុស្ស៊ី បានវាយលុកការប៉ុនប៉ង របស់អ៊ុយក្រែនក្នុងការឡោមព័ទ្ធ និងដណ្តើមយកក្រុង Balakliia ដែលគាត់បានលើកឡើងថា នៅតែស្ថិតក្នុងដៃរបស់រុស្ស៊ីដដែលនៅឡើយទេ ។
ទីភ្នាក់ងារព័ត៌មាន Reuters មិនអាចបញ្ជាក់ដោយឯករាជ្យ អំពីគណនីនៅសមរភូមិបាននោះទេ ។
នៅមុននេះ ឧត្តមសេនីយទោ Oleksiy Gromov របស់អ៊ុយក្រែន បានលើកឡើងថា កងទ័ពបានរុលទៅមុខរហូតដល់៥០គីឡូម៉ែត្រ ពីក្រោយខ្សែបន្ទាត់របស់រុស្ស៊ី និងដណ្តើមបានភូមិជាង២០នៅក្នុងតំបន់ Kharkiv ។
លោក Blinken បានប្រាប់ដល់អ្នកយកព័ត៌មាន មុនពេលចាកចេញពីទីក្រុង គៀវ ថា “យើងបានទទួលអ្វីដែលថ្មីៗដ៏ទូលំទូលាយអំពីការវាយលុក ហើយម្តងទៀត វាលឿនណាស់ ប៉ុន្តែយើងកំពុងឃើញការរីកចំរើនយ៉ាងច្បាស់លាស់ និងពិតប្រាកដនៅលើមូលដ្ឋាន ជាពិសេសនៅជុំវិញក្រុង Kherson ប៉ុន្តែក៏មានការអភិវឌ្ឍន៍គួរឱ្យចាប់អារម្មណ៍ មួយចំនួននៅក្នុង តំបន់ Donbas នៅប៉ែកខាងកើតផងដែរ” ៕
ប្រែសម្រួលដោយ៖ ម៉ៅ បុប្ផាមករា