បរទេស៖ នាយករដ្ឋមន្ត្រីហុងគ្រី លោក Viktor Orban បាននិយាយថា ការរំពឹងទុកនៃការបញ្ចប់ជម្លោះអ៊ុយក្រែន-រុស្ស៊ី គឺស្ថិតនៅក្នុងដៃ របស់សហរដ្ឋអាមេរិក ដែលជាអ្នកគាំទ្រដ៏សំខាន់របស់រដ្ឋាភិបាលទីក្រុងគៀវ។
យោងតាមសារព័ត៌មាន RT ចេញផ្សាយនៅថ្ងៃទី២៤ ខែធ្នូ ឆ្នាំ២០២២ បានឱ្យដឹងថា លោក Orban បានទទូចបែបនេះនៅក្នុង បទសម្ភាសន៍ជាមួយកាសែត Magyar Nemzet កាលពីថ្ងៃសៅរ៍ថា “អ៊ុយក្រែនអាចប្រយុទ្ធបានដរាប ណាសហរដ្ឋអាមេរិក គាំទ្រដោយលុយនិងអាវុធ” ។
លោកបានសង្កត់ធ្ងន់ថា “ប្រសិនបើអាមេរិកចង់បានសន្តិភាពនោះនឹងមានសន្តិភាព”។
ចាប់តាំងពីជម្លោះនៅអ៊ុយក្រែនបានផ្ទុះឡើងកាលពីចុងខែកុម្ភៈមក រដ្ឋាភិបាល ទីក្រុងវ៉ាស៊ីនតោនបានផ្តល់ ជំនួយផ្នែក យោធា និងហិរញ្ញវត្ថុរាប់ពាន់លានដុល្លារដល់ទីក្រុងគៀវ ក៏ដូចជាជំនួយផ្នែកចារកម្មយោធាផងដែរ។
ការផ្តល់ជំនួយធុនធ្ងន់បានរួមបញ្ចូលផ្នែករឹងដ៏ទំនើបដូចជា ប្រព័ន្ធមីស៊ីល HIMARS គ្រាប់រ៉ុក្កែតច្រើនប្រភេទ កាំជ្រួច M777 និងយន្តហោះគ្មានមនុស្សបើកប្រយុទ្ធ ហើយថ្មីៗនេះ គេបានប្រកាសថា យោធាអ៊ុយក្រែនក៏នឹងទទួល បានប្រព័ន្ធការពារដែនអាកាស Patriot ផងដែរ៕
ប្រែសម្រួលៈ ណៃ តុលា
