តូក្យូ ៖ ប្រទេសជប៉ុន បានអនុម័តផែនការសន្តិសុខអវកាស ជាលើកដំបូងរបស់ខ្លួនក្នុងគោលបំណងប្រើប្រាស់តំបន់ព្រំដែនឱ្យកាន់តែប្រសើរឡើង សម្រាប់គោលបំណងការពារក្នុងរយៈពេល ១០ឆ្នាំខាងមុខ ដើម្បីឆ្លើយតបទៅនឹងការកើនឡើង នៃការប្រើប្រាស់យោធានៃលំហអាកាសដោយចិន និងរុស្ស៊ី។
នៅក្នុងផែនទីបង្ហាញផ្លូវដែលត្រូវបានគូរឡើង ដោយផ្អែកលើយុទ្ធសាស្រ្តសន្តិសុខជាតិដែលបានធ្វើបច្ចុប្បន្នភាពក្នុងខែធ្នូ ឆ្នាំ២០២២ រដ្ឋាភិបាលរបស់នាយករដ្ឋមន្ត្រីជប៉ុនលោក ហ្វូមីអូ គីស៊ីដា ក៏បានប្តេជ្ញាចិត្តក្នុងការជំរុញគម្រោងការពារជាតិរបស់ជប៉ុន ដោយប្រើប្រាស់បច្ចេកវិទ្យាអវកាសក្នុងវិស័យឯកជនផងដែរ។
សសរស្តម្ភសំខាន់នៃប្លង់មេ គឺជាផែនការ សម្រាប់ពង្រឹងប្រព័ន្ធប្រមូលព័ត៌មាន ដើម្បីបង្កើនប្រសិទ្ធភាព នៃការវាយប្រហារប្រឆាំង ឬការវាយប្រហារមូលដ្ឋានសត្រូវ សមត្ថភាព ដែលជប៉ុន បានសន្យាកាលពីចុងឆ្នាំមុន ដើម្បីទទួលបាន ខណៈពេលដែលរក្សាបាននូវរដ្ឋធម្មនុញ្ញ ដែលបោះបង់ចោលសង្រ្គាម។
ផែនទីបង្ហាញផ្លូវត្រូវបានអនុម័តនៅពេលដែលទីក្រុងប៉េកាំង បន្តជំរុញគម្រោងអភិវឌ្ឍន៍លំហរផ្ទាល់របស់ខ្លួន ដោយជំរុញឱ្យមានការរំពឹងទុកថា ការប្រកួតប្រជែងរវាងចិន និងសហរដ្ឋអាមេរិក នៅក្នុងដែននឹងកាន់តែខ្លាំងឡើង។ រុស្ស៊ី ក៏បាននិងកំពុងពង្រីកសមត្ថភាពផ្នែកយោធារបស់ខ្លួនផងដែរ។
ប៉ុន្តែការប៉ុនប៉ងជាក់ស្តែងរបស់រដ្ឋាភិបាលជប៉ុន ក្នុងការពន្លឿនការធ្វើសមាហរណកម្មវិស័យការពារជាតិ និងវិស័យស៊ីវិលរបស់ប្រទេសនេះ អាចបង្កឱ្យមានប្រតិកម្ម តបតពីគណបក្សប្រឆាំង ដែលបានព្យាយាមរិះគន់គោលនយោបាយសន្តិសុខ ជាបន្តបន្ទាប់ដោយគណបក្សប្រជាធិបតេយ្យសេរី ដែលកំពុងកាន់អំណាចរបស់លោក គីស៊ីដា។
ក្នុងអំឡុងពេលកិច្ចប្រជុំរដ្ឋាភិបាលមួយកាលពីថ្ងៃអង្គារ លោក គីស៊ីដា បានលើកឡើងថា “សម្រាប់ជាប្រយោជន៍ដល់សន្តិសុខជាតិ យើងនឹងបង្កើនការប្រើប្រាស់ប្រព័ន្ធអវកាស និងធានានូវការប្រើប្រាស់ដែនប្រកបដោយសុវត្ថិភាព និងស្ថិរភាព”។
យោងទៅតាមប្លង់មេឲ្យដឹងថា ការអភិវឌ្ឍន៍បច្ចេកវិទ្យាក្នុងវិស័យអវកាសមាន “ផលប៉ះពាល់ផ្ទាល់ទាក់ទងនឹងផលប្រយោជន៍យោធា” ដោយលើកឡើងជាឧទាហរណ៍ នៃការប្រើប្រាស់ទិន្នន័យពីផ្កាយរណបពាណិជ្ជកម្មរបស់សហរដ្ឋអាមេរិក និងអឺរ៉ុប ដើម្បីជួយអ៊ុយក្រែន ក្នុងប្រតិបត្តិការយោធាក្នុងសង្គ្រាមការពាររបស់ខ្លួនប្រឆាំងនឹងរុស្ស៊ី ដែលបានលុកលុយប្រទេស កាលពី ១៦ខែមុន៕ ប្រែសម្រួល ឈូក បូរ៉ា
