សាន់ហ្វ្រាន់ស៊ីស្កូ៖ នាយករដ្ឋមន្ត្រីជប៉ុនលោក ហ្វូមីអូ គីស៊ីដា និងប្រធានាធិបតីចិនលោក ស៊ី ជីនពីង បានព្រមព្រៀងគ្នា ដើម្បីកសាងទំនាក់ទំនងទ្វេភាគី “ផលប្រយោជន៍ទៅវិញទៅមក” ដោយផ្អែកលើផលប្រយោជន៍ជាយុទ្ធសាស្រ្តរួម ទោះបីជាអ្វីដែលទីក្រុងតូក្យូចាត់ទុកថា ជាការហាមឃាត់ការនាំចូល “គ្មានវិទ្យាសាស្រ្ត” លើអាហារសមុទ្ររបស់ខ្លួន និងបញ្ហាដែលមិនទាន់សម្រេចផ្សេងទៀត។
នៅក្នុងកិច្ចប្រជុំទល់មុខគ្នាលើកដំបូងរបស់ពួកគេក្នុងរយៈពេលមួយឆ្នាំ លោក គីស៊ីដា បានឲ្យដឹងថា ភាគីទាំងពីរបានយល់ព្រមធ្វើកិច្ចពិគ្រោះជាមួយអ្នកជំនាញលើការបញ្ចេញទឹកវិទ្យុសកម្ម ដែលត្រូវបានព្យាបាលរបស់ប្រទេសជប៉ុនពីរោងចក្រថាមពលនុយក្លេអ៊ែរ Fukushima Daiichi ចូលទៅក្នុងសមុទ្រ ដែលជាប្រភពនៃភាពតានតឹងទ្វេភាគីនាពេលថ្មីៗនេះ។
ខណៈពេលដែលលោក គីស៊ីដា ទាមទារឱ្យមានការរឹតបន្តឹងនេះភ្លាមៗនោះ ទីភ្នាក់ងារសារព័ត៌មានស៊ីនហួរផ្លូវការរបស់ប្រទេសចិនបានដកស្រង់សម្តីលោក ស៊ី ថាបានជំរុញឱ្យប្រទេសជប៉ុន “ដោះស្រាយ” ឱ្យបានត្រឹមត្រូវនូវការហូរចេញ “នូវទឹកកខ្វក់ដោយនុយក្លេអ៊ែរ សម្រាប់សុខភាពមនុស្សជាតិទាំងអស់ និងបរិស្ថានសមុទ្រពិភពលោក” ។
ជាក់ស្តែងទីក្រុងប៉េកាំង មិនបានធ្វើសម្បទានលើបញ្ហាផ្សេងទៀត រួមទាំងការឃុំខ្លួនជនជាតិជប៉ុន និងការបង្កហេតុខាងយោធា ដែលកំពុងកើនឡើងនៅក្នុងច្រកសមុទ្រតៃវ៉ាន់ ដែលចង្អុលទៅផ្លូវដ៏វែងឆ្ងាយខាងមុខសម្រាប់ទំនាក់ទំនងទ្វេភាគី៕
ប្រែសម្រួល ឈូក បូរ៉ា
