ឧត្តមសេនីយ កំពូលរបស់អ៊ុយក្រែនថា អំពើពុករលួយ បានធ្វើឱ្យយោធា អ៊ុយក្រែន ចុះខ្សោយ

បរទេស៖ ឧត្តមសេនីយ កំពូលមួយរូប បានត្អូញត្អែរថា កងកម្លាំងប្រដាប់អាវុធអ៊ុយក្រែន មិនអាចមានប្រតិកម្មភ្លាមៗ ចំពោះការផ្លាស់ប្តូរស្ថានភាពសមរភូមិនោះទេ ពីព្រោះ ភស្តុភាររបស់ខ្លួនត្រូវបានបំផ្លាញ ដោយការិយាធិបតេយ្យ (ប្រព័ន្ធរដ្ឋបាលរបស់អង្គភាពមួយ) និងអំពើពុករលួយ។

យោងតាមសារព័ត៌មាន RT ចេញផ្សាយ នៅថ្ងៃទី២៩ ខែតុលា ឆ្នាំ២០២៤ បានឱ្យដឹងថា ការសម្របខ្លួនគឺ ជាតម្រូវការដ៏សំខាន់មួយ សម្រាប់យោធាទំនើប ហើយកងទ័ពរបស់ទីក្រុងគៀវ មានការខ្វះខាតក្នុងរឿងនេះ ប៉ុន្តែមិនមែនដោយសារតែកងទ័ពនោះទេ ។ នេះបើតាមការលើកឡើង របស់ឧត្តមសេនីយ Dmitry Marchenko ដែលចូលរួមក្នុងការការពារទីក្រុងកំពង់ផែ Nikolayev បាននិយាយនៅក្នុង បទសម្ភាសន៍មួយកាលពីថ្ងៃចន្ទ។

លោកបាននិយាយដោយសំដៅទៅលើកង្វះខាតក្នុងឧស្សាហកម្មការពារជាតិអ៊ុយក្រែនថា “ជាអកុសល ការិយាធិបតេយ្យរបស់យើង អំពើពុករលួយ របស់យើងមិនអនុញ្ញាត ឱ្យយើងសម្របខ្លួន និងផលិតនូវអ្វីដែលយើងត្រូវ ការបានយ៉ាងឆាប់រហ័សនោះទេ” ។

លោកបានបង្ហាញការសោកស្ដាយ ចំពោះឱកាសដែលបាត់បង់ ក្នុងការបង្កើនផលិតកម្ម រវាងរដ្ឋប្រហារក្នុងទីក្រុងគៀវក្នុងឆ្នាំ ២០១៤ និងការផ្ទុះអរិភាព ជាមួយរុស្ស៊ីនៅដើមឆ្នាំ ២០២២។

ឧត្តមសេនីយ៍អ៊ុយក្រែនរូបនេះ បន្ថែមថា “អ្នកនយោបាយ និងមន្ត្រីរបស់យើងមួយចំនួនបានរំលង [សម័យនោះ] ហាក់ដូចជាពួកគេឈប់សម្រាក” ។ លោក Marchenko បានអះអាងថា យុទ្ធនាការទិញសព្វាវុធក្នុងប៉ុន្មាន ឆ្នាំមុនរហូតដល់ឆ្នាំ ២០២២ “បានបរាជ័យ” ប៉ុន្តែរដ្ឋមន្ត្រីការពារជាតិ Andrey Taran ត្រូវបានអនុញ្ញាតឱ្យលាលែង ពីតំណែងដោយមានការសរសើរ ចំពោះការងាររបស់គាត់៕
ប្រែសម្រួលៈ ណៃ តុលា