នយោបាយ

ទូតអាមេរិក សង្ឃឹមថា ពលរដ្ឋខ្មែរ នឹងអាចស្តាប់លឺ សំឡេង VOA និងអាស៊ីសេរី ផ្សាយតាមវិទ្យុក្នុងស្រុក

ភ្នំពេញ ៖ លោក W. Patrick Murphy ឯកអគ្គរដ្ឋទូត សហរដ្ឋអាមេរិក ប្រចាំកម្ពុជា បានសម្តែងក្តីសង្ឃឹម យ៉ាងមុតមាំថា នៅក្នុងរយៈពេល ដ៏ខ្លីខាងមុខនេះ ប្រជាពលរដ្ឋខ្មែរ នឹងស្តាប់លឺការផ្សាយ របស់វិទ្យុVOA និងអាស៊ីសេរី ផ្សាយនៅតាមវិទ្យុក្នុងស្រុក ដូចដើមវិញ ។ នេះបើតាមការបង្ហោះ លើផេកទូតអាមេរិក។

ការលើកឡើងរបស់លោកនេះ ក្នុងជំនួបជាមួយលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន នាព្រឹកថ្ងៃទី១៥ ខែវិច្ឆិកា ឆ្នាំ២០១៩។

ក្នុងជំនួបផ្តោតលើការពិភាក្សា ពីតួនាទីដ៏សំខាន់ នៃប្រព័ន្ធផ្សព្វផ្សាយឯករាជ្យ ក្នុងដំណើរការលទ្ធិប្រជាធិបតេយ្យ និងពីរបៀបដែលអាមេរិក និងកម្ពុជា អាចធ្វើការជាមួយគ្នាបាន ដើម្បីជួយស្តារវិស័យសារព័ត៌មាន នៅកម្ពុជាឲ្យមានភាពរស់រវើក និងសេរីភាពពេញលេញ ។

លោកឯកអគ្គរដ្ឋទូត Murphy បានកត់សម្គាល់ឃើញថា ការចុះបញ្ជីឡើងវិញ ក្នុងពេលថ្មីៗនេះ របស់វិទ្យុសំឡេង សហរដ្ឋអាមេរិក គឺជាជំហានសំខាន់មួយទៅមុខ ។

លោកបានសម្តែងក្តីសង្ឃឹមថា “ក្នុងពេលដ៏ខ្លីខាងមុខនេះ ប្រជាពលរដ្ឋកម្ពុជាទាំងអស់ នឹងអាចស្តាប់ឮការផ្សាយ តាមវិទ្យុក្នុងស្រុក នូវកម្មវិធីនៃវិទ្យុសំឡេងសហរដ្ឋអាមេរិក និងសេចក្តីរាយការណ៍ពីព័ត៌មាន ដ៏សំខាន់ទាំងក្នុងស្រុក និងអន្តរជាតិពីវិទ្យុអាស៊ីសេរី” ។
វិទ្យុរបស់អាមេរិកទាំងពីរនេះ បច្ចុប្បន្នផ្សាយតែតាមរយៈផេក បណ្តាញសង្គមហ្វេសប៊ុក ផ្ទាល់ខ្លួនប៉ុណ្ណោះ គឺមិនផ្សាយតាមវិទ្យុ ក្នុងស្រុកដូចពេលមុនឡើយ ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top