ព័ត៌មានជាតិ

មីជាតិ បរិច្ចាគ មី១០០កេស ជូនប្រជាពលរដ្ឋ ទីទ័លក្រនៅកោះសូទិន

កំពង់ចាម ៖ មីជាតិ បានចូលរួមបរិច្ចាគ មីចំនួន១០០កេស ជូនប្រជាពលរដ្ឋទីទ័លក្រ ១០០គ្រួសារ នៅស្រុកកោះសូទិន ខេត្តកំពង់ចាម កាលពីថ្ងៃទី ១២ ខែមករា ឆ្នាំ២០២០ ដោយសហការ ជាមួយអង្គការមូលនិធិគាំទ្រកុមារ និងអជ្ញាធរមូលដ្ឋាន ។

កម្មវិធីសប្បុរសធម៌នេះ ត្រូវបានរៀបចំឡើង ក្នុងបរិវេណសាលាបឋមសិក្សាកណ្តាលកោះត្បូង ក្នុងស្រុកកោះសូទិន ។

លោក វ៉េង រចនា តំណាងក្រុមហ៊ុន ផលិតផល មីជាតិ បានឲ្យដឹងថា «ការចូលរួម របស់មីជាតិ ក្នុងថ្ងៃនេះ កើតចេញពី ក្តីអាណិតស្រលាញ់ និងចង់ចូលរួម សម្រួលដល់ជីវភាព ប្រជាជនកម្ពុជា ដែលមានជីវភាពខ្វះខាត ហើយការចូលរួមនេះ ក៏សរបញ្ជាក់ពីការប្តេជ្ញាចិត្តថ្មីរបស់មីជាតិ ក្នុងសកម្មភាពសង្គម ពិសេសកម្មវិធីសប្បុរសធម៌ជាមួយប្រជាជនខ្មែរយើង» ។

លោកបន្តថា «ក្នុងនាមជាជាតិសាសន៍ដូចគ្នា យើងត្រូវចេះជួយគ្នា ។ បើប្រជាជនខ្មែរបន្តគាំទ្រមីជាតិ ដែលជាស្មាដៃខែ្មរ មីជាតិនឹងបន្តជួយសង្គម និងប្រជាជនខ្មែរយើងវិញ ដូច្នេះ សូមប្រជាជនខ្មែរយើងបន្តគាំទ្រមីជាតិ ដើម្បីឲ្យមីជាតិ មានលទ្ធភាពបន្តជួយលើកស្ទួយសង្គមកម្ពុជាយើងបន្តទៀត» ។

ផ្ទាំងពាណិជ្ជកម្ម

អ្នកតំណាង ក្រុមហ៊ុនផលិតផលមីជាតិ ក៏បានអំពាវដល់សាធារណជន យុវជនប្រុសស្រី និងក្រុមហ៊ុនឯកជននានាផ្សេងទៀតរួមគ្នាបង្កើត និងចូលរួម ក្នុងសកម្មភាពសប្បុរសធម៌ ជួយសង្គមឲ្យកាន់តែទូលំទូលាយបន្តទៅទៀត ។

នេះមិនមែនជាលើកទី១ ទេ ដែលមីជាតិចូលរួមក្នុងសកម្មភាពសប្បុរសធម៌ កាលពីចុងខែធ្នូ ឆ្នាំ២០១៩ មីជាតិ ក៏បានសហការជាមួយវីតាល់ រៀបចំកម្មវិធី ផ្តល់អំណោយជា អាវ ភួយ ថ្នាំសង្កូវ គ្រឿងឧបភោគ បរិភោគ និងថវិកាមួយចំនួនជូនដល់ប្រជាជនខ្វះខាតប្រមាណ ៣០០នាក់ ក្នុងរាជធានីភ្នំពេញផងដែរ ។

គួរបញ្ជាក់ផងដែរថា មីជាតិ ជាផលិតផលមីកញ្ចប់របស់ខ្មែរ ដែលមានរសជាតិបែបខ្មែរ ដំបូងគេបង្អស់នៅប្រទេសកម្ពុជា និងត្រូវបានផលិតឡើងដោយប្រើប្រាស់ ម៉ាស៊ីនជប៉ុន និងបច្ចេកវិទ្យាជប៉ុន ដើម្បីធានាឲ្យបាន គុណភាពខ្ពស់ស្របតាមបទដ្ឋានអន្តរជាតិ ។ មីជាតិមានបីរសជាតិ គឺសាច់ជ្រូកចិញ្ច្រាំ ស៊ុបមាន់ និងខគោ ៕

To Top