ភ្នំពេញ ៖ បុរសជនសង្ស័យម្នាក់ ត្រូវកម្លាំងនគរបាល ឃាត់ខ្លួន ពេលជិះម៉ូតូឌុបមករកសង្សារ ហើយប្រទះឃើញម៉ូតូទុកចោល ក៏ធ្វើសកម្មភាពលួច យកគេចខ្លួន បានរយះពេល៣ថ្ងៃ នគរបាលចាប់វាយខ្នោះ ។
ហេតុការនេះកើតឡើង កាលវេលាម៉ោង១០និង០០នាទីព្រឹកថ្ងៃទី២៧ ខែ មីនា ឆ្នាំ ២០២០ ចំណុចបុរីឧទ្យាបាសាក់ ស្ថិតនៅភូមិ១០ តាមផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន ។
ជនរងគ្រោះឈ្មោះ យ៉ែម ចាន់ន្នី ភេទស្រី អាយុ២៤ឆ្នាំ ជនជាតិខ្មែរ ស្នាក់នៅផ្ទះកម្មករកោះពេជ្រ មុខរបរ កម្មករធ្វើការនៅកោះពេជ្រ
នគរបាលឃាត់ជនសង្ស័យឈ្មោះ ញ៉ៅ ឌីណា ភេទប្រុស អាយុ ៣៤ឆ្នាំ មុខរបរបើកបររថយន្តដឹកទំនិញ ស្នាក់នៅសង្កាត់ព្រះពន្លា សង្កាត់ព្រែកប្រា ខណ្ឌច្បារអំពៅ ឃាត់ខ្លួនពីបទលួចម៉ូតូ សំភារះបាត់បង់មាន ម៉ូតូ០១គ្រឿង ម៉ាកHONDA TODAY ពណ៌ផ្កាឈូក ពាក់ស្លាកលេខ ភ្នំពេញ 1BZ-0219 ។
លោក សាល សណ្តុះ នាយប៉ុស្តិ៍ទន្លេបាសាក់ ខណ្ឌចំការមន បានអោយដឹងថា ក្រោយពីទទួលបានបណ្ដឹង កាលពីថ្ងៃទី២៤ ខែ មីនា ឆ្នាំ ២០២០ បានទុកម៉ូតូកូនទាកើតហេតុខាងលើ តែជនសង្ស័យម្នាក់ បានលួចយកទៅបាត់ រួចក៏ទទួលបណ្ដឹង ជនរងគ្រោះរួចកម្លាំង នគរបាលប៉ុស្តិ៍ ធ្វើការស្រាវជ្រាវតាមផ្នែកជំនាញ ។ លុះដល់ថ្ងៃទី២៧ ខែ មីនា ឆ្នាំ ២០២០ ក៏ធ្វើការឃាត់បាននៅចំណុចផ្លូវព្រះនរោត្ដម ក្បែរស្ពានអាកាសក្បាលថ្នល់ នាំយកមកសាកសួរនាំ ។
នគរបាលបន្តថា ជនសង្ស័យមុនកើតហេតុ បានមកលេងផ្ទះសង្សារខ្លួន ដោយជិះម៉ូតូឌុប ហើយក៏ឃើញម្ចាស់ម៉ូតូទុកចោល និងភ្លេចដកកូនសោចេញទៀត សំរេចចិត្តលួចម៉ូតូតែម្តង ។
ក្រោយឃាត់ខ្លួន សមត្ថកិច្ចបាននាំជនសង្ស័យ ទៅយកម៉ូតូមកវិញ ហើយប្រគល់ទៅជនរងគ្រោះវិញ និងបានកសាងសំណុំរឿងបញ្ជូលជនសង្ស័យទៅអធិការដ្ឋានខណ្ឌ ដើម្បីចាត់ការបន្ត ៕
